Shillong: Mijal Sonibar salo KHADC, uamangni ong·atenggipa summer session-o Council-ni ning·o ga·akgipa jolrango Uniform Civil Code (UCC)-ko ra·gataniko champengna jinma namnikenba official resolution-ko pass ka·angaha.
KHADC-ni CEM Pyniaid Sing Syiem, resolution-ko session-o chanchirimdilangaha. ‘Ma·mong a·songni gimik bakrangon UCC-ko ra·bana ja·ku de·enga, indiba an·ching iako champengna ba UCC-ko champengna Executive Committee, official resolution-ko ra·bana tik ka·aha’ ine Pyniaid aganaha.
“Ma·mong sorkarini a·songni gimik bakrango Uniform Civil Code-ko ra·bana miksonganiara an·chingni custom, tradition ba dakrik-bewalrango, niam ja·rikanio, toromni gita jakgittel ong·anio aro bia ka·ani niamrango nangchakegen, ine Syiem aganaha.
Uni gimin India sorkariko Khasi Hills Autonomous District Council-ni ning·o ga·akgipa a·jao ba jolrango UCC-ko ra·gataoniko watchangna mol·molatna house, tik ka·aha. Ong·jaode an·chingna India-ni Constitution-ni Sixth Schedule-ni ning·o ong·ipa man·gnirangko gimatgen.
Ma·mongni ia ja·ku de·anina, Council namen jajrengbeenga, maina ia UCC-ara Khasi jat manderangna on·gimin special status-o nangchakegen.
EC-ni ia resolution-ni gimin chanchirimanio chakpae bak ra·mitingo Opposition dilgipa Titosstarwell Chyne, ‘ADCs (KHADC, JHADC aro GHADC)-ni meeting-oba ge·gittam council-rang a·doko UCC -ko ra·gataniko namniktokgijaniko paraktokaha’ ine jinmana u·iataha.
Indake ong·engon Chyne, KHADC-ko Council-ni UCC-ko jegalani bidingo Law Commission of India (LCI)-na chitiko seatchina aganku·pattiaha.
Council, UCC-ko ra·gataniko maini gimin namnikjaenga ba champengenga, iani gimin LCI-na talatode nambatgen ine aganaha.
Resolution-ni gimin chanchirimanio Deputy CEM PN Syiem aro a·gipi MDC Bindo Mathew Lanong- uamangba bakko ra·angaha.
