TURA: Da·al June-ni 26 tarik Sombar salo, International Day Against Drug Abuse & Illicit Trafficking-ko maniani bak gita West Garo Hills a·jao tom·tomgipa songsalko ong·atna ‘No Honking Day’-ko manienga.
Ia salko maniani bidingo talataniko on·angengon, ia salo pekatgipa samrangko jakkalani aro niam gri badingani bidingo manderangna mikrakatanirangko on·angan baksana tom·tomgipa songsalko ong·atna pring 8:00 bajioni attam 4:00 bajiona ‘No Honking Day’-ko manianggen ine West Garo Hills a·jani Deputy Commissioner Jagdish Chelani parakatenba, ia somoirango manderangko skatang horn-rangko on·jachina didiataha.
Deputy Commissioner-ni u·iatani gitade, West Garo Hills a·jani pilak biaprangon, pring 8:00 bajioni attam 4:00 bajiona skatang horn-rangko on·jawa aro nangchongmotani somoirang, jekai maiba kenjagokna nangani ba a·sel ong·anirangko champengna nangani somoirangosan horn-rangko jakkalna man·aigen.
Ia niamko ja·rikchina gita West Garo Hills a·jani Traffic Police department nirok sandianirangko dakanggen ineba Chelani parakataha.
Indake ong·genchimoba ian ambulance, fire brigade aro niam retirangko nirokenggipa dolrangnade maming champengani dongjawa ine Deputy Commissioner talataniko on·angaha.
