TURA: Boldorenggre sub-centre ba Health & Wellness Centre-ara jolo gitchambatsranggipa sub-centre ong·enga ine jolo songdongenggipa manderang aro mongsongbate Boldorenggre, A·killanggre, Takingre, Kantragre aro samba jolo donggipa songni manderang parakatenba, jolo songdongenggipa manderangni namgnina ia sub-centre-ko Primary Health Centre (PHC)-ona ra·doatenba doctor-ko donatchina gita didie, Tura-ni MP Agatha K Sangma-na sedoataha.
Jolo songdongenggipa manderangni parakatani gitade, ia sub-centre ba Health & Wellness Centre-o kam ka·enggipa manderang, an·tangtangni bil ama gitan jolo songdongenggipa manderangna dangdike on·na jotton ka·engachim indiba ia centre-o manderangko sangipa doctor-rang dongjae, kam ka·enggipa manderang aro sanna bananirangko ra·enggipa manderangba neng·nikanirangko chagrongna nangtokenga.
“Uni gimin ia sub-centre-ko PHC-ni gadangona ra·doatenba, ia PHC-o doctor saksako ta·ken donatchina chinga mol·molenga,” ine Boldorenggre jolo songdongenggipa manderang parakataha.
Indake ong·engon, ia sub-centre-na sringe on·chenggipa bijoliko MeECL rattonge galahani a·sel ia centre-ko da·o bijoli gri chalaina nangeba neng·nikanirangko chagrongna nangtokenga ine sub-centre-o kam ka·enggipa manderang parakatenba, ia sub-centre-na ta·raken bijoliko chate on·china West Garo Hills a·jani District Medical & Health Officer (DM&HO)-ko didiataha.
Boldorenggre sub-centre-o kam ka·enggipa manderangni parakatani gitade, da·o ia sub-centre-o bijoli dongjaengani a·selan samrangko aro ma·manti bosturangko rakkianio aro gipin kamrangko ka·anioba neng·nikanirangko chagrongna nangtokengachim.
Ia sub centre-o kam ka·enggipa MLNP aro chowkidar-na ta·raken staff quarter-ko rike on·china, sub-centre-o waiting area-ko rikchina, Boldorenggre Health & Wellness Centre-ni main gate aro boundary wall-ko kachina, centre-ni a·arang rurongangjana gita Rongkhon chisamo guard wall-ko kachina aro uandakgipa gipin kamrangni giminba ia sub-centre-o kam ka·enggipa manderang, West Garo Hills a·jani DM&HO-na gisik ra·ataniko on·angaha.
