SHILLONG: Khasi Hills Autonomous District Council (KHADC)-o National People’s Party (NPP)-sa dolsanchi dal·batgipa ong·engani gimin United Democratic Party (UDP)-chi dilenggipa Executive Committee (EC)-ni be·gruaniko UDP ra·chakna nanga ine NPP parakataha.
KHADC-o bilakgipa opposition dol ong·e, jolni namgnina kamrangko ka·skachina gitaba NPP, UDP-ko didiataha.
“KHADC-o uamangde dal·batgipa dol ong·ja ine uamang ma·sina nanga aro chingasa uamangko janggilchini chadrapa ine chingko matnanganiara ortogrisan ong·aia,” ine National People’s Youth Front (NPYF)-ni spokesperson aro KHADC-ni MDC Bajop Pyngrope parakataha.
KHADC-ni special session-o No-Confidence Motion-ko ama man·ani ja·man, uamangko NPP janggilchini chadrapaha aro kragija dakgipa politics-ko kal·aha ine UDP, NPP-ko matnangahachim.
Iana aganchakaniko on·angengon, “Chingade uamangko janggilchini chadrapa ong·ja indiba KHADC-ni mongsonggipa kamrangkon saksa sakgni membor-rangsa, gipinrangna maming u·iatani gri jako ra·e ka·engachim aro iani a·selsa UDP-chi dilenggipa Executive Committee be·gruna nangaha,” ine Pyngrope parakataha.
NPP-sa KHADC-o dal·batgipa dol ong·ani gimin Executive Committee-ko dilna kraa ineba ua aganaha.
“KHADC-o chingasa dal·batgipa dol ong·a ine uamang ra·chakenba, bilgipa opposition dolni kamko jako ra·on nambatgipa ong·gen,” ine NPYF-ni ku·wattimgipa parakataha.
