SHILLONG: Tura-o PA Sangma Stadium-ni retaining wall ba pakmarang be·anggipako magisterial inquiry dakchina gita West Garo Hills district administration-ni ge·etaniko Robibar salo, a·dokni Opposition Trinamool Congress (TMC) dol jegalatenba, ia a·selko a·dokni technical expert ba kamni gimin u·i-ma·sigipa manderangchisa sandirokatchina dabiangaha.
“Iandakgipa technical project-ni bidingo maikai magistrate-rangsa sandirokgen? Nokko rikani bidingo u·i-ma·sigipa manderangkosa iani bidingo sandirokatna nanga aro ia sandirokgipa dolko chief engineer-ni gadango dilna gita nanga. Maini gimin iandakgipa project-na magisterial inquiry-kosa sorkari ge·etskaenga?” ine TMC-ni state vice president George B Lyngdoh sing·doangaha.
PA Sangma Stadium-ni paksamsao donggipa pakmarang be·wakangahani gimin adita salrangna skangsan magisterial inquiry-ko dakna gita West Garo Hills a·jani Deputy Commissioner ge·etangahachim.
Ia stadium-ni pakmarang be·wakanganiko magistrate-chi sandirokchina ge·etani gimin sorkariko sing·doatengon, “Ia stadium-ko rikanio tangka paisarangko jakkalsretani, namgijagipa bosturangko jakkalani ba stadium-ko rikanio kamrang namjaesa pakmarang be·wakenganaba gnang, uni gimin iani bidingo sandirokengon, technical expert-rangko nangchongmota,” ine Lyngdoh parakataha.
Contractor-rangko chel·chakna jotton ka·engani gimin sorkariko matnangatengon, “Indita dam rakbegipa stadium-ni be·wakangako nikani ja·manoba sorkari pa·sike mesokna jotton ka·kuenga. Ia contract-ko sorkari, Badri Rai-na on·ja ine contractor-rangko jokatna jotton ka·engama?” ine TMC-ni dilgipa sing·doataha.
Ong·gija dakgipa kamrangna sorkari chake mesokangkugen ong·ode a·dokni manderang sorkarini kamo bebera·na man·jawaha ineba Lyngdoh parakataha.
“Ia stadium-ara a·dokni saksa mingnamgipa dilgipani bimingo rikgipa stadium-sa ong·ani gimin Chief Minister an·tangan kamrangko re·rurae nirokahachim indiba iandakgipa ong·gija kamrango sorkari jak on·angkugenchimode darangba sorkario ka·dongna man·jawaha,” ine ua aganaha.