TURA: Tura-ni Dakopgre-o donggipa PA Sangma Stadium-ni retaining wall-ko a·a gitchakchi dapahani a·selsa be·wakna gita nangaha ine Sombar salo, Tura-ni MDC aro BJP-ni dilgipa Bernard N Marak parakataha.
Marak-ni parakatani gitade, retaining wall ba rakatgipa pakmarangko dapna gita gitchakgipa a·a ba a·dubekrangkode jakkalna gita expert-rang on·jachim indiba PA Sangma Stadium-ni pakmarangko a·a gitchakchi dapahani a·selsa mikkarang waangani ja·man a·arang nom·e be·wakangaha.
“Pakmarangko dapanio ong·gija bosturangko jakkalahani a·selsa ia stadium-ni pakmarang be·wakaha. Retaining wall-rangko rikanio maming saloba a·a gitchak aro a·dubekrangkode dapna gita jakkalrongjachim maina iano chirang chimonge ja·mano a·ako jreata. Ia pakmani a·kolko a·a gitchakchi dapahani a·selsa chirang joksruna man·jae ja·mano be·wakna gita nangaha,” ine Marak parakatenba, ia pakmako back fill ka·anio ro·ong, an·cheng, a·dimu aro uandakgipa bosturangkosa jakkalna nangachim ine talataniko on·angaha.
Ia stadium-ni pakma be·wakanio a·dubekrang jo·olani a·selsa ong·aha ine sorkarini talatgipani gimin sing·doangengon, “Sawa ia stadium-ko rikanio nirokgipa engineer aro stadium-ko rikgipa contractor-ara? Police department baditana kingking kakket ong·e iani bidingo sandiroka uko nina gitasa anga FIR-ko ka·ahachim indiba sandirokaniko a·bachengna skangan, Tura-ni SP Vivekananda Rathore, iana chakpaesa talataniko on·aha aro ia project-ni DPR-koba police-rang sandijaha,” ine Marak matnangataha.
PA Sangma stadium-ara gong kror 128-ni project-sa ong·ani gimin aro CM-ni pagipani bimingchi minggipa stadium-sa ong·ani gimin kamrangko name ka·na nangachim ine janapatengon, ia pakmarangoniko a·a gitchakko ra·galchina aro gallery-rango nokkingko tarichina gita Tura-ni MDC didiataha.
