SHILLONG: Meghalaya a·dokni Reservation Policy-ko nipilna gita Expert Committee-ni membor-rangko sandina songako man·gipa Search Committee somoirangko nangdapkuenga ine Mongolbar salo, a·dokni Cabinet Minister aro MDA sorkarini ku·wattimgipa Ampareen Lyngdoh parakataha.
Iani bidingo kobor ra·timgiparangna talataniko on·angengon, Reservation Policy-ko nipilna gita Expert Committee-ni membor-rangko sandina a·bachengengaha indiba membor-rangko seokengon, maming gualanirang dongjana gita Search Committee-na chu·onga gita somoirangko on·na nangenga ine Lyngdoh parakataha.
Expert Committee-ni sakbonga membor-rangko sandina gita, Chief Secretary-chi dilenggipa membor sakgittamni Search Committee-ko adita salrangna skangsan sorkari songe donangahachim ine nikna man·a.
“Expert Committee-ko dilna sienggipa aro committee-ni membor ong·na sienggipa manderangko Search Committee, sandina a·bachengaha indiba committee-ni membor-rangko seokanio name seokna man·na gita ia committee-na an·ching chu·onga gita somoirangko on·na nangenga,” ine Cabinet Minister parakataha.
Ian namen ka·sine chanchina nanggipa kamsa ong·ani gimin sorkari sikkele kamko ka·na nangnikjaenga ine talataniko on·angengon, “Expert committee-ni membor-rangko seokanioba somoiko ra·e ka·sinesa seokna gita nanggen maina sikkele kamko ka·anichi ia kamko name chu·sokatna man·jawa,” ine Lyngdoh aganaha.
Lyngdoh-ni parakatani gitade, reservation policy-ni bidingo dingtang dingtang dolrangni sing·anirangko nieba ia Expert committee-ni membor-rangko sandigen.
“Ia sing·anirangko ma·sie ra·chengani ja·man manderangni gisikrangko ma·siahaon expert committee-ni membor-rangkoba seokna gita ma·signok. Uni gimin manderangni aro dingtang dingtang dolrangni sing·anirangkoba name nina nangenga,” ine ua aganaha.
June-ni 14 tariko reservation policy-ni gital office memorandum-ko sorkarini mesokanganio roster system-ko nipilani gnangma mikkangchina tarigenma name talate on·anirang dongja ine dingtang dingtang dolrangni matnanganirangna aganchakaniko on·angengon, roster-ko ra·gatani giminde dingtang committee donga ine Lyngdoh parakataha.
Gipin Scheduled Tribe (ST)-rangnaba Job Reservation Policy-o 15 percent-ko donchina dabienggipani gimin janapatskaengon, re·anggipa antion iani bidingo chief minister baksa a·doko songdongenggipa gipin ST-rang baksa tom·e chanchirimaha ine Lyngdoh parakataha.