SHILLONG: Mongolbar salo, Meghalaya Cabinet-ni tom·aniko ong·atangenba, Job Reservation Policy-ni dingtang dingtang Office Memorandum (OM)-rangko taridapaha.
Iani bidingo a·dokni Chief Minister Conrad K Sangma, jinmana talataniko on·angengon, 1972 bilsio ST aro SC-rangna bangbang ong·gipa biaprangni bidingo Personnel Department-ni Reservation Policy aro Reservation Roster-ni Office Memorandum-koba Cabinet taridapaha ine janapatenba, da·o ia OM-ko taridapahani gimin ST aro SC-rangna advertise ka·gipa vacancy post-rang ge 9 ba una komiani dongjawaha maina da·o reservation policy-o roster point-kosa ja·rikanggnok ine parakataha.
“Uni gimin da·o kamrangko advertise ka·engon ba u·iatengon, vacancy dongani kri ong·jawaha indiba roster point gitasa ong·gnok,” ine Chief Minister parakataha.
Garorangna vacancy donggipa kamrangko kanggipani gimin 1974 bilsio on·gipa Office Memorandum-koba taridapaha ine talataniko on·angengon, da·o iano Garo category-na vacancy donggipa kamrangko Meghalaya a·dok ning·o donggipa Garorangsan gapatna man·aignok aro skango tarigipa OM gita gipin a·dokrangni Garorangkode ia vacant post-rango gapatna on·jawaha ine Chief Minister parakataha.
2020 bilsio, Persons with Disabilities (PwDs) ba be·eni gita cholgri ong·gipa manderangna reservation roster-ni Office Memorandum-ko taridapani gimin janapatskaengon, be·enni gita cholgri ong·gipa manderangna reservation policy-o biapko donani kri reservation roster-koba ja·rikanggen aro gitcham Office Memorandum-ko ja·rikjawaha ine Chief Minister parakataha.
District level-o kamna dorgasto galenggipa candidate-rangna reservation policy-ni Office Memorandum-o gital niamko ra·gataha ine talataniko on·angskaengon, District Selection Committee (DSC) gita dorgasto galenggipa candidate-rang, a·jatangtangni ku·sikchi dorgastorangko galna man·na gita bilko on·gen ine Chief Minister parakataha.
