SHILLONG: Durand Cup 2023-na robol kal·susaaniko sokachakanio dakchakanirangko on·na gita a·dok sorkari, dingtangmancha Host City Committee-ko songe donangaha.
Sorkarioni u·iataniko on·atani gitade, ia Host City Committee-ko Sports & Youth Affairs department-ni Commissioner & Secretary, chairperson ong·e dilgen aro ia committee-o East Khasi Hills a·jani Deputy Commissioner, SP (City) Tourism Department-ni Director, Arts & Culture department-ni Director aro gipinrangba membor ong·e dongpagen.
Ia Host City Committee-an Durand Cup-ko sokachakenggipa organising committee-na pilak nanga dakchakanirangko on·gen aro JN Football Stadium-ko tarisamsoanirangkoba nirok sandianggen.
Ia Host City Committee-an, Durand Cup-ko sokachakanio nangchakegipa dingtang dingtang kamrang, jekai Trophy Tour, Opening Ceremony-na tarisamsoani aro Shillong-o kal·atna sienggipa match-rangnaba pilak kamrangko ka·gen ine u·iataha.