SHILLONG: Adita salrangna skang, Tura-o PA Sangma Stadium-ni mitam pakmarang be·wakanggipani bidingo Garo Hills-ni saksa Amit R Marak minggipa mande, Meghalaya High Court-na public interest litigation (PIL) ka·angaha.
Ia stadium-ni pakmarang be·wakangani gimin PIL ka·doangengon, ia pakmarang be·ani a·selko name sandichina aro stadium be·anio jak donggipa manderangna nanga gita daitorangko tikatchina gita High Court-ko didiangaha.
Iani bidingo Meghalaya High Court, Budbar salo hearing-ko dakengon, iani bidingo a·dok sorkarini dingtang dingtang official-rangna notice-rangko on·china gita High Court-ni division bench, ge·etaniko on·angaha.
Ia stadium-ko rikna dongimin niamrangko name mesokchina gita ia stadium-ko rikgipa supervising agency-naba High Court, ge·etaniko on·angaha.
Indake ong·engon, ia stadium-ni pakma be·wakanganichi sambao donggipa ramarang champengatako man·enggen inenba ia ramarangko rongtalatchina gita High Court, a·dok sorkarina ge·etaniko on·angaha.
Ia PIL-ni gimin changgipa hearing-ko re·baenggipa July 6 tariko dakanggen ineba High Court parakataha.
PA Sangma Stadium-ko gong kror 127.7 koros ong·e rikahachim aro ia stadium-ko a·dokni Chief Minister Conrad K Sangma, re·anggipa bilsini December jaon nokdonggae on·ahachim.
