SHILLONG: Khasi Hills Autonomous District Council (KHADC)-o National People’s Party (NPP) baksa bakrime gital Executive Committee-ko rikani ja·man, Meghalaya Pradesh Congress Committee (MPCC)-ni secretary A Goldenstar Nonglong, kamtangko watangaha.
An·tangni kam watani chittiko MPCC-ni president-na on·atengon, Congress dolko dilenggiparangni ja·ku de·ani uni bebera·ani aro nangnikanirang baksa apsan ong·ja ine nikahani gimin ua Congress doloni ong·katna tik ka·aha ine Nonglong parakataha.
“Uni gimin ia ka·a be·ani gnang, MPCC-ni secretary aro Congress dolni gipin kamrangkoba watangengaha,” ine Nonglong, an·tangni resignation letter-o parakataha.
KHADC-o NPP-na chakpaaniko on·e Assembly-o Opposition ong·e dongna tik ka·aniko ua ra·chakna gita man·jahachim.
“KHADC-o Congress dolni sakdok MDC-rangde NPP-na chakpaaniko on·enga indiba Assembly-ode sakbonga MLA-rang, NPP-ni kosako Opposition ong·e dongskaenga. Ia sakdok MDC-rangoni sakgittamde MLA-rangba ong·enga indide maikai apsan somoion NPP-na chakpaeba apsan dolni kosakon opposition ong·e dongnaba man·a?” ine MPCC-ni gitcham secretary sing·doataha.
Nonglong-ni parakatani gitade, KHADC-o NPP baksa bakrimna manchianiko ua MPCC-ni tom·anion raken jegalahachim indiba Congress-ni gipin dilgiparang uni jechakaniko knachakgija ja·kuko de·angaiahachim.
2022 bilsio Congress dolni sakbonga MLA-rangko ra·galani gimin janapatengon, “Congress dolni dilgiparang an·tangtangan iandakgipa niamrangko ra·gateba an·tangtangan pe·enga aro ian Congress dolni niam aro ja·rikbagipa bebera·ani ong·ja,” ine Nonglong parakataha.
