SHILLONG: Meghalaya a·doko Inner Line Permit (ILP)-ko ra·gatchina aro Khasi/Garo ku·sikrangko Constitution-ni Eighth Schedule-o napatchina dabianirangko chu·sokate on·chipkujaengani gimin Bristibar salo, North East Students Organisation (NESO), ia dabianirangni gimin ma·mong sorkarina gisik ra·atpilaniko on·angaha.
“Salgro salaramni pilak a·dokrangon ILP-ko ra·gatchina NESO dabiengachim indiba da·alonan Nagaland, Arunachal Pradesh aro Mizoram a·dokrangna agre Manipur a·dokosan ILP-ko ra·gate on·engkua. Meghalaya, Tripura aro Assam a·dokrangode da·onan ILP-ko ra·gatkujaenga,” ine Bristibar salo, NESO-ni chairman Samuel Jyrwa parakataha.
Meghalaya a·dokna ILP-ko on·china dabienggipani bidingo janapatengon, bilsibrina skangan a·dok sorkari, ILP-na resolution-ko pass ka·manahaoba da·alonan ma·mong sorkari ILP-ko on·chipkujaenga ine Jyrwa parakataha.
“Maini gimin Meghalaya a·dokna ILP-ko on·jaenga, uamangsan a·selkode ma·sienga, uni gimin Meghalaya a·doko ILP-ko ra·gate on·jaengani a·selko ma·mong sorkari talate on·na nanga,” ine NESO-ni chairman dabiangaha.
ILP-ko ra·gatchina aro Khasi/Garo ku·sikrangko Eighth Schedule-o napatchina dabienggipani bidingo ma·mong sorkari namen ma·siengachim ine janapatengon, “Ia pilakan salgro salaram a·dokrangko ma·mong sorkarini nirok sandina gisiko nanggijaniko mesokani ong·enga,” ine Jyrwa parakataha.
India a·songni jakgitelaniko man·chengaonin salgro salaram a·dokrangde nichanggalako man·enga ine janapatskaengon, Meghalaya, Assam aro Tripura a·dokrango ILP-ko ra·gate on·na gisiko nangjaenganian ma·mong sorkarini nirok sandina gisik nanggijaniko mesokani ong·a ine NESO-ni chairman parakataha.