BAGHMARA: South Garo Hills a·jani Chokpot C&RD Block ning·o donggipa dingtang dingtang biaprango niam gri koelarangko bikotenga ine matnanganiko South Garo Hills a·jani Superintendent of Police (SP) Abraham T Sangma jegalatenba, a·jani pilak biaprangon koela bikotaniko police-rang champengataha ine talataniko on·angaha.
Chokpot jolrango niam gri koelarangko bikotenga ine saksa Flaming Marak minggipa mandeni, gitcham Judge Justice Katakey-na badi ka·doangenba, iani bidingo sandirokaniko dakchina didiatani ja·man South Garo Hills a·jani SP, iani bidingo talataniko on·angskaaha.
Meghalaya a·doko niam gri koela bikotaniko National Green Tribunal (NGT)-ni gita champengatmanahaoba, South Garo Hills a·jani Chokpot C&RD Block ning·o donggipa dingtang dingtang biaprango, niam gri koelarangko bikotenga ine matnangenba, Flaming Marak minggipa mande saksa, June-ni 27 tariko, Meghalaya High Court-ni gitcham Judge-na badi ka·doangahachim ine nikna man·a.
Marak-ni badi ka·doangani gitade, Chokpot Block-ni ning·o donggipa Jetra, Darengre aro Udugre songrango niam gri koelarangko bikotengkuachim.
Uni iandake matnanganiko jegalatskaengon, “South Garo Hills a·jao gital koelarangko bikotna man·jana gita police-rang da·o mikrakbee kamrangko ka·enga aro a·jao nikna man·enggipa koelarangba gitcham bikotgiminrangsan ong·aia. Official-rang nangnikgenchimode iarangko re·bae nie ra·ena man·aigen. Indiba Chokpot jolrango da·o dipet gital koelarangko bikota dongja,” ine SP parakataha.
