TURA: Bristibar pringo, East Garo Hills a·jao donggipa Nengkra Watregittim-oni bilsi 15 ong·gipa chadambe saksa, an·tangni ripengskarang baksa Rongtam chibimaoniko na·tok rim·engmitingo sripe sina nangaha.
Ia chadambeni chio gimaani ja·man bakan Williamnagar, Rongjeng, Nongalbibra aro Tura-o donggipa FES/SRT dolrangna koborko on·ataha aro uandaken ia dolrang, Rongtam chibimaoniko sandiani ja·man, chio gimagipani manggisiko man·aha ine kobor on·aha.
Iani bidingo police-rang ning·tue am·sandianirangko dakengkua ineba kobor on·aha.
Ia sal somoirango mikkarang wajringenganichi Garo Hills-ni bang·bata biaprangon chirang ta·rakengani gimin skatang chi sambarango rojachina gita District Administration mikrakatanirangko on·engachim ine nikna man·a.
