WILLIAMNAGAR: Ia sal somoirango mikkarang wajringenganio chiringrang dal·bae manderangna kenchakna nanganirang ong·engani gimin East Garo Hills Police-ni gita manderangna agan-ku·pattianirangko on·ataha.
Da·o gita mikkarang wajringengmiting somoirango, chibima, chiring, chiontim ba je chini bimangrangonaba kal·susana, na·tok rim·na, jroe rona, ring chona ba ma·manti kamrangna re·angjachina gita police-rang didiataha.
Bi·sarangko ba bilsi sokkugijagipa bi·sarangko, matri saa ba siboke saanirang donggipa manderangko da·o gita somoirango chiring na chibimarango simsakgija watbrange donjachina gitaba East Garo Hills a·jani police-rang didiataha.
Pangnana mikka balwa rakgni ba rakna siani koborrangko ra·jringchina gitaba police-rang, a·jani manderangko didiataha.
Chiring ba chibima sepangrango donggipa manderangkoba da·o gita mikka waani somoirango pangnan chi ditdobaako ba chi banbaako nirikkie dongjringchina aro mikrakbate dongchina gita police-rang didiataha.
Sakgipinrangko dakchakna skang pangnan an·tangtangna naljokanirangko nichengchina gitaba police-rang didiataha.
Maiba dakchakanirangko nangani somoirango aro a·sel ong·ani somoirango, 100/112 nomborrangona aro 8794765696/6009841060 nomborrango Police Control Room-na phone ka·china gitaba East Garo Hills a·jani police-rang u·iataha.
Adita salrangna skangsan, mikkarang jime waangani ja·man East Garo Hills a·jani Nengkra jolo chadambe saksa sripe sina gita nangahachim aro South Garo Hills a·jaoba mande saksa sripe sina gita nangahachim.