SHILLONG: Citizenship (Amendment) Bill (CAB)-ko ra·gatanio National People’s Party (NPP)-ba jak dongani gimin da·o Uniform Civil Code (UCC)-ko NPP-ni national president aro a·dokni Chief Minister Conrad K Sangma-ni jegalaniara politics kal·na ‘dakmikanisan’ ong·aia ine a·dokni Opposition Trinamool Congress (TMC) matnangataha.
TMC-ni state vice president George B Lyngdoh-ni parakatani gitade, CAB-ko NPP-ni dilgiparang a·bachengo jegalahaoba ja·manode ra·chakaiahachim aro uandaken da·o UCC-ko jegale mesokaniba, NPP-ni dakmikaniko mesokani gitasan ong·engachim.
“Ian NPP-ni dakmikaniko mesokanisan ong·aia maina CAA-ko pass ka·na Parliament-ona ra·baani somoioba skanggipade uamang (NPP), CAA-ko jegalachim indiba ja·mano ia CAA-ko pass ka·e niam pil·atanio uamangba jak dongpagiparangan ong·aha. CAA-ko ra·chakani ja·man NPP-ni chong·mot bimangko a·songni manderang pilakan nikna man·aha,” ine Lyngdoh aganaha.
India a·songara dingtang dingtang jat aro toromo bebera·giparangni meli nangrime songdong a·chaenggipa a·songsa ong·ani gimin Uniform Civil Code (UCC)-ara a·songni kosako re·ani gitasa ong·a ine Sukrobar salosan, a·dokni Chief Minister aro National People’s Party (NPP)-ni national president Conrad K Sangma parakatahachim.
“NPP-ni nikaniode Uniform Civil Code-ara India a·songni kosako re·gipa niam gitasa ong·enga. Iako anga chingni party-ni nikanikosa aganenga,” ine Chief Minister aganahachim.
Sangma-ni iandakgipa kattarangko jegalatskaengon, ia changoba NPP-ni dilgiparang UCC-ko jegale mesokna jotton ka·enga indiba ja·manode an·tangtangni man·gniko chanchie ra·chakpiltaiani cholrang dongaia ine TMC-ni dilgipa parakataha.
“Ma·mongo BJP-chi dilenggipa NDA sorkario bak ong·paenggipa dol ong·e, uamang (NPP), BJP baksa nangrime dongnasa jotton ka·enga aro da·alo uamang UCC-ko jegalengoba ja·mano Parliament-ona ra·angahaode BJP sorkarini nangnikani gitan ong·paaigen,” ine Lyngdoh aganaha.
