SHILLONG: Meghalaya a·dokni dam 844 adhoc upper primary (UP) skulrangko deficit-ni gadangona ra·dona gita proposal-ko on·china gitcham MDA sorkarini agangipani bidingo gisik ra·atpilaniko on·na gita Sombar salo, Meghalaya Upper Primary School Association (MUPSTA)-ni membor-rang, a·dokni Education Minister Rakkam A Sangma-ko grongeaha.
Education Minister-ko grongeani ja·man kobor ra·timgiparangna talataniko on·angengon, a·dokn i dam 844 adhoc UP skulrangko deficit-ni gadangona ra·doatna gita proposal-ko on·china 2019-2020 bilsirangon gitcham MDA sorkari aganmanahani gimin iani bidingo gisik ra·atpiltaianiko on·na gitasa da·alo Education Minister-ko grongeaha ine MUPSTA-ni president Kenneth Shadap parakataha.
“Chingko gronge agangrikanio Education Minister, chingna namen aganchakanirangko on·aha aro iana chinga kusi ong·a. A·dokni dam 844 adhoc UP skulrangko deficit-ni gadangona ra·dona gita proposal-rangko on·china gitcham sorkari aganahani giminsa chinga da·aloba sorkariko gisik ra·atpiltaina re·baaha,” ine ua aganaha.
Education Minister baksa agangrikanirangko talate on·angengon, ia kamko MDA II sorkari chu·sokatna da·o cholrangko name nipiltaigen ine Education Minister, MUPSTA-ni dilgiparangna ku·rachakaniko on·ataha ine Shadap parakataha.
“Anga sorkariko matnangenga ong·ja indiba COVID sajinmani a·sel aro gitcham MDA sorkarini somoio tangka paisarangna neng·nikanirangko man·ahani a·sel chingni dabianirangko chu·sokatna man·jaha,” ine MUPSTA-ni president aganaha.
Indake ong·engon, gipin skulrango skigiparang gitan, adhoc skulrango skigiparangba apsan kamrangko ka·paengani gimin gipin skigiparang gitan apsan dormaharangko man·pana gita adhoc UP skulrangko deficit-ni gadangona ra·doatchina gita a·dokni Education Minister-ko didiangaha ine MUPSTA-ni president parakataha.