SHILLONG: Ma·mong sorkarini ra·gatna miksongenggipa Uniform Civil Code (UCC)-ko adita salrang skang, a·dokni Chief Minister Conrad K Sangma jegalatani ja·man da·o iani Bill-o maiko sea uko nichengna nanggen ine aganskaaha.
“Iani Bill-o maiko sea donga uko chinga name nichengna nanggen aro uni ja·manosa chinga iani bidingo aganna man·gen,” ine Sombar salo, Chief Minister parakataha.
UCC-ko a·dokni Chief Minister Conrad K Sangma-ni jegalani ja·man, salgro salaram a·dokrango BJP-chi dilenggipa NDA sorkario bakrimenggipa dingtang dingtang dolrangba jegaltokahachim ine nikna man·a.
Indake ong·engon, ia Bill-o badiaba badiaba jolni aro mongsongbate salgro salaram jolrango donggipa Scheduled Tribe (ST) aro Scheduled Caste (SC)-rangko watani aro matrilineal society ba me·chikchiko ra·gipa songsalrangko watani dongama dongjawa uko nichengna gita nanggen ine Sangma parakatskaaha.
UCC-ni bidingo dingtang dingtang dolrang aro a·songni dingtang dingtang biaprango songdongenggipa manderang baksa agangrikchenggija ra·gatna nanggenchimode namen neng·nikaniko ra·baani gita ong·gen ine janapatengon, iani bidingo agangrikchengani gride salgro salaram jolni manderang ia niamko ra·chakna man·jawa ine Chief Minister parakataha.
“Uni gimin chinga Bill-o seanirangko nichengna nanggen aro bill-o an·ching gita dakgipa manderangko chel·chakna chu·onga gita niamrang dongjagenchimode an·ching jinma apsan chanchirime ja·kuko de·na man·gen. Indiba da·o dipet bill-ko nichenggijade skatang aganna man·kujawa,” ine Sangma aganaha.
India a·songara dingtang dingtang jat aro toromo bebera·giparangni meli nangrime songdong a·chaenggipa a·songsa ong·ani gimin Uniform Civil Code (UCC)-ara a·songni kosako re·ani gitasa ong·gen ine re·anggipa Sukrobar salosan, a·dokni Chief Minister aro National People’s Party (NPP)-ni national president Conrad K Sangma parakatahachim ine nikna man·a.
