TURA: Reservation Policy-ni Roster system-ko nipilani gnangsa ra·gatchina Garo Hills-ni dingtang dingtang dolrang dabitokengon, Roster system-ko nipilani gnang ra·gatjagenchimode High Court-ni dongimin niamko pe·ani gita ong·gen ine New Tura Development Forum (NTDF) parakatenba, je dolrangan roster system-ko nipilani gnang ra·gataniko jegalengachim, High Court-ona re·ange badi ka·echina gita didiataha.
Meghalaya a·doko Reservation Policy-ko ra·gatchengaonin Garorangna chamgimin 40 percent-ko nanga gita man·jaha ine Garo Hills-ni dingtang dingtang dolrang parakatenba, reservation roster-ko ra·gatengon, Garorangni man·na nangkuenggipa bak rengsirangko man·na gita batanggimin somoirangko nipilani gnangsa ra·gatchina a·dok sorkariko didiengachim ine nikna man·a.
Indake ong·engon, NTDF dolni gitaba roster system-ko nipilani gnangsa ra·gatchina sorkariko didiangenba, iako chu·sokatna man·ja ong·ode High Court-ni ge·etaniko manija gita ong·gen ine parakataha.
A·chikrangni namgnina roster system-ko ra·gatna man·jagenchim ong·ode Meghalaya a·dokni pilak A·chik MLA-rangan, kamtangtangko watna nanga ineba NTDF didiataha.
“Roster system-ko batanggimin somoiko nipilani gnang ra·gatchina gita High Court-sa raiko on·ahani gimin iako chu·sokatna man·jagenchimode High Court-ni ge·etaniko manija gitasa ong·gnok aro je dolrangan nipilani gnang ra·gataniko jegalengachim, High Court-ona re·ange badi ka·on nambatgipa ong·gen,” ine NTDF-ni president D Ch Marak parakataha.
