TURA: July-ni 3 tariko, West Garo Hills a·jani National People’s Party (NPP) dol, tom·aniko ong·atangenba, ma·mong sorkarini ra·gatna miksongenggipa Uniform Civil Code (UCC)-ko jinma jegalangenba, Manipur a·doko so·sojengjeng ong·enganichi duk mikchirangko chakna nangenggipa manderangna kalimrimpaaniko aro jinma bi·chakanirangkoba dakangaha.
Tom·aniko Tura South AC-ni block president Lonerson Ch Marak dilangaha aro ia tom·anio NPP-ni state level general secretary CN Sangma baksana state working president SB Sangma, tom·anio bak ra·giparangna aganprakangengon, ma·mong sorkarini ra·gatna miksongenggipa UCC-ni bidingo talatanirangko on·angenba, ian Tribal-rangna aro mongsongbate Kristianrangna namen neng·nikanirangko ra·bana sienggipa niam ong·enga ine parakangaha.
UCC-ko jegalanio a·dokni Chief Minister aro NPP-ni national president Conrad K Sangma-na chakpaanirangko on·na tik ka·angengon, Parliament-o UCC-ko pass ka·aniko raken jegalna gita a·dokni MP-rangko ku·rang on·china didina tik ka·e donangaha.
Manipur a·doko ong·enggipa obostarangni gimin chanchirimangskaengon, Manipur-o so·sojengjeng ong·engani a·sel neng·nikanirangko chagrongna nangenggipa manderangna kalimrimpaaniko mesoke, Manipur a·doko tom·tomaniko on·pilchina gita West Garo Hills NPP-ni membor-rang, jinma mombati so·e bi·chakanirangkoba dakangaha.
