SHILLONG: Uniform Civil Code (UCC)-ko ra·gatani bidingo Law Commission of India-ni jinmana u·iataniko on·angani ja·man, Meghalaya a·dokkode ia UCC-oni watna gita ma·mong sorkarina ku·pattianiko on·china Hynniewtrep Youth Council (HYC), Law Commission-ko didiatskaaha.
Iani bidingo Law Commission-na sedoatengon, Meghalaya a·dokoba UCC-ko ra·gatna nanggenchimode a·doko songdongenggipa Tribal-rangni daka rikanirangko, Sixth Schedule-ni ning·o on·gimin niamrangko aro autonomous district council (ADC)-rangna on·gimin bilrangko pe·ani gita ong·gnok ine HYC parakataha.
ADC-rangna tangka paisani gita dakchakanirangko aro an·tangtangni niamrangko taridapna dakchakanirangko on·na gita ma·mong sorkariko ku·pattiatchina didiatengon, “Uniform Civil Code-ara India a·songo sorkari chalaiani bewalko pe·an baksana toromni kamrangkoba bringbrangatgnok,” ine HYC parakataha.
HYC-ni parakatani gitade, Indian Constitution-ni Sixth Schedule ning·o autonomous district council-rang, bia ka·ani, jik-se galgrikani, gam-jin man·rikani aro uandakgipa dingtang dingtang daka rikanio niamrangko tarina bilko man·ahachim indiba UCC-ko Meghalaya a·doko ra·gatgenchimode ADC-rangna on·gimin ia pilak bilrangan indinsa ong·gramaignokchim.
“Uni giminsa Meghalaya a·doko songdongenggipa Tribal manderangde Uniform Civil Code-ko raken jegalaigen maina ian jatni daka rikani aro toromo bebera·ani pilakkon bon·atna sienggipasa ong·enga,” ine HYC parakataha.