U·IATTIMGIPAONI
TURA: Agia-Medhipara-Phulbari-Tura (AMPT) ramao donggipa Gaptuli dolong nosto ong·angengahani a·sel re·ruraenggipa manderangna kenchakna nangani ong·engaha ine Garo Students Union (GSU) Western Zone (West) Raksamgre parakatenba, ia dolongko ta·raken taripile on·china PWD-ni chief engineer-na sedoataha.
GSU WZW Raksamgre-ni general secretary Tengroang Marak-ni parakatani gitade, ia Gaptuli dolongara AMPT ramao ge·sa mongsonggipa dolong ong·achim indiba ia dolongko nipiltaianio ia dolong da·o re·rurana namjaengaha ine adita salrangna skangsan official-rang nikahachim.
“Ia dolongni mitam bakrango be·anganirangko nikna man·engaha indiba ia rama gita salantian hajalni hajal garirang re·ruraenga. Ia dolong maibakae be·na nangode ian re·ruraenggipa manderangni janggina kenchakna nangani ong·gen,” ine Marak parakatenba, ia dolongko ta·raken nambate tarichina PWD official-ko didiataha.
