U·IATTIMGIPAONI
SHILLONG: ‘Nature Solves’ ine pangchakaniko donenba Bristibar salo G20 Conclave ba tom·bimonganiko Shillong songjinmao ong·atangaha aro ia tom·bimonganio a·dokni Chief Minister Conrad K Sangma-ba dongpae bakko ra·angaha.
Ia tom·bimonganio a·dokni Chief Minister, jinmana aganprakangengon, ia tom·aniko ong·ataniara a·gilsakko nambatatna gita jinma apsan chanchirimna dingtang dingtang biaprangoni u·i-ma·sigipa manderangko rimchimongbaaha ine parakangaha.
“Chengonin Meghalaya a·dokni manderang samtangtango ong·telaigiparang baksa janggi tangrimgipa ong·a aro ia ong·telaigipa buring bolgrimrangko chingni pagitchamrang chengonin ripinge rakkibaenga,” ine Chief Minister aganaha.
Manderangni daka rikani aro janggi tangani bewalrangara a·gilsak baksa pangnan namrimgipa ong·a ine janapatengon, samtangtango ong·telaigipa buring bolgrimrangchian a·dokni manderang seng·aniko aro meli nangrimaniko man·bagiparang ong·a aro ianon a·dokni manderang rasongba chaa ine Chief Minister parakataha.
“Meghalaya a·doko songdongenggipa dingtang dingtang jatrang, samtangtango ong·telaigiparang baksa nangrime janggi tanganiko a·gilsakna dakmesokgiparang ong·skana man·gen,” ine Sangma aganaha.
Meghalaya a·doko donggipa Sacred Grove-rang ba rongtalgipa bolgrimrangni gimin janapatskaengon, ia bolgrimrangara buringni rongtalgipa bak ong·a aro iako chengonin a·dokni manderang, jatni u·i-ma·sibaanio pangchake ripingenga ine Chief Minister parakataha.
Chief Minister-ni parakatani gitade, Meghalaya a·dok gimiko hectare 10,000 ong·gipa a·arango gimik dam 100-na baten rongtalgipa bolgrimrang aro hectare 2,500 ong·gipa a·arango dam 150-na baten dingtang dingtang songrangni kange dongimin buring bolgrimrang donga.
“Meghalaya a·doko chinga buring bolgrimrangko ripingna gita Green Meghalaya program-ko a·bachengataha aro ia program-ni ning·o ripingenggipa songrangna boksisrangko on·enga. Ia program-chi chinga da·o bilsi 5-ni gisepo hectare lak 2 buring bolgrimrangko ripingna miksongenga,” ine Chief Minister aganaha.
Meghalaya a·dokni Clouded Leopard aro Hill Myna mascot-rangni bidingo talataniko on·angskaengon, iarangan a·doko buring bolgrimrangni bang·aniko mesokani ong·a ine Chief Minister parakataha.
