U·IATTIMGIPAONI
TURA: Garo Hills Autonomous District Council (GHADC)-o, Indian Constitution-ni Article 244 (2) aro 275-ni ning·ogipa Sixth Scheduled-ni paragraph 20-o segimin niamko pe·aniko bon·atchina gita New Tura Development Forum (NTDF) Bristibaro GHADC-ko didiaha aro re·baenggipa 2025 MDC election-rangode a·doktangni chong·mot manderangna dingtang Electoral Roll-ko ra·gatchina gita didiataha.
A·doktangni ong·gijagipa manderangko Council-ni kamrango bak ra·atan baksa election-rangoba susana on·enganiara Indian Constitution-ni ning·o Sixth Scheduled-na on·gimin niamrangko pe·ani ong·a ine sakkiko mesokenba NTDF memborrang, Bristibaro memorandum kingsako GHADC CEM, Albinush Marak-na on·aha.
“Indian Constitution-ni Sixth Scheduled-ni ning·o janapgimin gitade, a·doktangni ong·gijagipa manderangkode, chong·motan non-Tribalrangkode Autonomous District Council (ADC) Election-rango bak ra·ani aro susaaniko champengani gnang. Garo Hills-ni mandetangna on·gimin ADC-ara Garo Hills Autonomous District Council (GHADC)-an ong·a. Unigimin, a·doktangni ong·gijagipa, chong·motan non-Tribal-rang aro A·chik an·chi bringipa, jedake A·chik me·chikko kimgipa non-Tribalrangko GHADC election-rango bak ra·na on·na nangja. GHADC-de dingtangmancha A·chikrangna mangmang on·giminsa ong·a” ine forum, uamangni memorandum-o janapaha.
Sixth Schedule-ara, Assam, Meghalaya, Mizoram aro Tripura-ni Hill Tribal district-rangnasan choliaigipa ong·a, Meghalaya A·dokni GHADC-na agrede Salgro-Salaramni darang a·dokoba ADC election-rango non-tribalrangko bak ra·na on·a dongja ineba Forum gisik ra·ataniko on·aha.
Sixth Scheduled-ni ning·o daksogimin niamrangko ra·gatjani a·sel, non-tribalrang GHADC-ni kamrangko bakko ra·na gita cholrangko ra·enga, unigimin A·chikrangna dingtangmancha Electoral Roll-ko ta·raken tarichina gita Forum didiaha.
