U·IATTIMGIPAONI
SHILLONG: Sixth Scheduled ning·o ga·akgipa biaprangko aro India a·songni salgro salaram jol gimikkon Uniform Civil Code (UCC)-oniko watgen ine Meghalaya a·dokni Chief Minister Conrad K Sangma parakataha.
Bristibar salo, Sohryngkham-o donggipa Nichols Roy Bible College-ni bus gariko a·bachengate on·na gita tom·aniko ong·atanio jinmana aganprakangengon, UCC-ko a·songo ra·gatna nanggenchimoba Tribal-rangni songdongchakenggipa biaprangode nangchakeani dongjawa ine una talataniko on·ataha ine Chief Minister parakataha.
UCC-ko ma·mong sorkarini ra·gatna miksonganiara Tribal sakantinan aro mongsongbate a·songo Tribal dilgipa ong·e una namen jajrengchakna nangani ong·aha ine janapatengon, iani bidingo ua jegalatani ja·man ma·mongni dilgiparang una UCC-ni gimin bang·en talate on·tokaha ine Sangma parakataha.
Ma·mong sorkarini ra·gatna miksongenggipa Uniform Civil Code (UCC)-ko Meghalaya a·dok baksana salgro salaram a·dokrango dingtang dingtang dolrang jegalsotokengon, ian a·songni ‘general area’-rango ra·gatna sienggipa niamsa ong·ani gimin Constitution-ni Sixth Schedule ning·o chel·chakako man·enggipa Tribal a·dokrangnade nangchakeani dongjawa ine adita salrangna skangsan, BJP-ni state vice president aro Tura-ni MDC Bernard N Marak-ba parakatahachim.
“General area ine aganengon uan gimikna tarigimin niamchi chalaigipa ba sason ka·gipa biaprangkosa miksonga aro ian Constitution-ni dingtangmancha on·gimin niamni ning·o chel·chakako man·enggipa Tribal area-rangnade nangchakeani dongjawa. Salgro salaram jolrangko skangonin nichanggalahani gimin ia jolrangko tang·doatna gitasa BJP nangnikenga aro Tribal-rangni nitobegipa daka rikanirangko nisigalna miksonganirang dongja. A·dokko sason ka·anio dingtang dingtang political dolrangni ra·e katgimin Tribal-rangni biaprangko aro daka rikanirangko ra·bapilnasa BJP nangnikenga,” ine Marak aganahachim.
UCC-ara tribal-rangnade maming nangchakeaniko ra·bajawa ine a·kangatengon, ian general area-rangna miksonge tarigipa niamsa ong·ani gimin Tribal-rang iana jajrengna nangjawa ine Marak talataniko on·angaha.
UCC-ko jegalanirang batroroengani gimin BJP-ni sakgipin dilgipa Alexander Laloo Hek-ba, torom ba jatni kosako re·gipa niamrangkode on·na nangja ine parakataha.
“Iako anga BJP-ni dilgipa ong·e aganenga ong·ja indiba India a·songo songdonggipa aro Meghalaya a·dokni dilgipa ong·esa aganenga,” ine Hek aganaha.
