U·IATTIMGIPAONI
SHILLONG: East Jaintia Hills-o Ubiattandence (UBI) app-ko jakkalna uamang jechakode uamangni dormaharangko dondipate dongen ine district-ni bil gnanggiparangni mikrakataniko school skigiparangni Joint Action Committee (JAC) raken jeataha.
Ubi apps-ko jakkalchina skigiparangna agan-mesoke on·china ua Deputy Commissioner-chi ge·etako man·aha ine East Jaintia Hills District-ni Sub-Divisional School Education Officer (SDSEO), skigiparangna u·iataniko on·ao jakkalgijagiparangni kosako raken ja·ku de·gen aro dormaharangko ru·ute on·gen ine mikrakataha.
The Shillong Times-na, Meghalaya SSA Schools Association (MSSASA) president, Aristotle Rymbai aganao apps-ko jakkalgijagipa a·sel mingsana mangmang maikao uamang skigiparangni dormaharangko ru·ute on·a man·gen ua sing·doaha.
“Lekka-pora skie on·ani a·bao education system-ko nambatatna sorkarini ja·ku de·ani kosako chinga chakatjaenga. Indiba ia gitalgipa ja·ku de·ani Education department-oni sokbaja,” Rymbai aganaha.
Ia apps-ko ra·baaniko jegalanio raken dongchina ua uni ka·rimska skigiparangko didiaha.
Uni aganani gita skigiparang chu·gimik on·kange kamtangko ka·enga, bang·bata skigiparangan dongimin somai gitan skul ka·na skultangtangona somai gitan sokenga aro ka·enga.
Skigiparangni skul ka·ako nirokna department-o Block Resource Person aro Cluster Resource Person donga maina private app-ko jakkalna nangenga, MSSASA president aganaha.
“Ua officer-rang uamangni kamrangko ka·jaengakon indakesa ia private app-ko jakkalna aganenga,” Rymbai sing·a gnang aganaha.
District authority-rang ia app-ko ra·gatode uamang mobile dongna nanggnok, ua aganaha.
“Uamangni official kamna uamangni mobile-ko jakkalna skigiparangko ka·dongna man·jawa. Education system-ko nambatatna na·simang ku·rachakode mobile-rangko on·a neng·nikani dongna nangjawa,” MSSASA president aganaha.
