U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o susana gita ma·mongni BJP dol, candidate-rangko sandina a·bachengatahaoba da·o dipet Meghalaya a·dokoni susana sienggipa candidate-rangkode BJP-ni dilgiparang seokkujaenga ine kobor on·aha.
“Candidate-rangko sandina gita BJP-ni committee donga aro ma·mongni dilgiparangan candidate-rangko sandina a·bachengengahani gimin a·dokoba BJP-ni dilgiparang candidate-rangko sandina a·bachengengaha. Da·o election-na baditaba jarangsan dongaiahani gimin chinga kamrangko ta·rakatgnok,” ine Robibar salo BJP-ni ku·wattimgipa M Kharkrang parakataha.
BJP-ni gita candidate-rangko sandie donmanahama ine sing·anina aganchakaniko on·angskaengon, da·o dipet BJP-ni dilgiparang, candidate-ko name seoksrangade ong·kujaenga ine Kharkrang parakataha.
Shillong Parliamentary seat-o uaba susaani cholrang dongama ine sing·on, “Anga an·tangde Lok Sabha election-na an·tangko candidate dake minga dongkuja indiba iako anga dolni dilgiparangosa pakwatenga. Uamangosa candidate-ko seokani daitode ong·aigen,” ine Kharkrang aganaha.
Da·o dipet Meghalaya a·doko Shillong aro Tura Parliamentary constituency-rang donga aro Shillong-o Congress dolni Vincent Pala, changgittamna MP ong·e dongengon Tura-ode NPP-ni Agatha K Sangma, MP ong·skaengachim ine nikna man·a.
