U·IATTIMGIPAONI
SHILLONG: PIL-ko ka·angani ja·man Meghalaya High Court-ni ge·etaniko man·e a·dok sorkari, West Khasi Hills a·jani Shallang jolrango niam gri chalaienggipa coke karkana ba koela so·ani karkanarangko Robibar sal dipet pe·e galna a·bachengataha ine kobor on·aha.
Sorkarioni koborko on·ani gitade, Shallang jolo niam gri chalaienggipa karkana damsako Robibar attamo pe·e galaha aro re·baenggipa July 20 tarikni gisepon gipin dam 46 karkanarangkoba pe·e galna miksongenga.
“Shallang jolo iandakgipa dam 57 karkanarang donga aro ianoni dam 47 karkanarangkode maming niamrang grisa chalaienga. Ia karkanarangko chalaina gita darangonikoba permission-rangko ra·chengjaha aro karkanarangko chalaienggipa manderangba register ka·giparang ong·jachim,” ine sorkari official saksa parakataha.
Adita salrangna skang a·dokni Chief Minister Conrad K Sangma-ni dilanichi tom·aniko ong·atangenba, ia jolrango niam gri chalaienggipa coke karkanarangko pe·e galna manchiangaha aro ia tom·anio a·dokni Chief Secretary, DGP aro gipin official-rangba bakko ra·angaha ine kobor on·aha.
High Court-ni ge·etaniko man·ahani gimin ia karkanarangko July 10-ni gisepon pe·e galtokchina Chief Minister ge·etahachim indiba somoirang dongjahani gimin official-rang, July 20 tarikona somoiko ra·dapaha ine kobor on·timgiparang parakataha.
“Chinga mikkang antio kamrangko a·bachengtaie man·a dipetde antini bon·achibara karkanarangko pe·e galtokna jotton ka·gen. July 20 tarikni gisepon chinga chu·gimik karkanarangko pe·e galna man·gen ine ka·dongenga,” ine sorkari official parakataha.
Koborko on·ani gitade, ia jolrango niam gri chalaienggipa dam 47 coke karkanarangni bang·bata nokgiparangan Assam aro a·songni gipin bakrangonisa ong·achim aro Garo Hills-oniba ia jolrango niam gri karkanarangko chalaienggiparang dongachim.
“A·dokni je biapoba an·ching gue keli dokkanmangmangko kulina gitaba permission-ko ra·chengna nanga indiba ia karkanarangko maming permission grisa chalaitokenga. Ia kamrango dilgiparang jak dongjagenchimode maikai iandake niam gri karkanarangko chalaina man·genchim?” ine mitam manderang sing·doataha.
