U·IATTIMGIPAONI
TURA: Lekka poranian Meghalaya sorkarini mongsonggipa daito ong·enga ine Chief Minister Conrad K Sangma-ni changni chang aganani ja·manoba Education Ministry-ni Performance Grading Index (PGI)-o Meghalaya a·dok bon·kamgipa biaposa ong·rongengani gimin NPP-chi dilenggipa MDA sorkariko Garo Hills-ni Trinamool Congress (TMC) matnangataha.
“Lekka poranian sorkarini mongsonggipa kam ong·a ine Meghalaya CM Conrad Sangma-ni changni chang aganahaoba Education Ministry-ni Perfomance Grading Index-o bon·kamgipa biapkon man·kuenga aro ian namen ra·chakna man·gijani ong·enga. Ian NPP-chi dilenggipa MDA sorkarini, lekka porako mongsongbatgipa ong·e ra·na ku·rachakaniko chu·sokatna man·gijaniko mesokanisa ong·enga,” ine Robibar salo, TMC-ni chadambe dolko dilgipa Richard Marak parakataha.
Meghalaya a·doko lekka porani gadangko namdapatna gita kamrangko ka·jaengani gimin aro namdapatna gisiko nangjaengani gimin MDA sorkarian daiko ra·na nanga ine janapatengon, a·dok sorkarini iandake namgipa lekka poraniko on·na man·jaengani a·sel chatro chatrirangsa neng·nikanirangko chagrongna nangtokenga aro ian a·dokna namen nitogijani ong·enga ine Marak parakataha.
“Uni gimin lekka porani a·bao chagrongna nangenggipa neng·nikanirangko ta·raken namatchina chinga dabienga. Lekka porani a·bako namdapatchina dabiengon, tangka paisani gita dakchake on·aniko bariatan baksana skigiparangna training on·aniko namdapatchina aro lekka poraniko namdapatanio manderangni bakrimanikoba ra·china chinga dabienga. An·chingni chatro chatrirangna namgipa lekka poraniko on·anichisa a·dok namroro silrorona man·gen aro sorkari an·tangni ku·rachakako chu·sokatna nangchongmota,” ine TMC-ni chadambe dolko dilgipa parakataha.
