U·IATTIMGIPAONI
SHILLONG: Meghalaya a·doko aro mongsongbate Khasi Hills jolrangona rel gari ra·napbaaniko dingtang dingtang dolrang jegaltokengon, bostu salgipa rel garirangni gamchataniko aro maini gimin Meghalaya a·dokna bostu salgipa rel garirangko nangengachim, a·dokni manderangna ning·tubate talate on·china gita a·dokni Opposition Trinamool Congress (TMC), a·dok sorkariko didiataha.
Bostu salgipa rel garirangni namgnirangko a·dok sorkari, manderangna name agan-talate on·na man·na nanga ine janapatengon, “Batanggimin bilsirangonin a·dokona rel gari ra·napbaaniko dingtang dingtang dolrang jegaltokaha indiba a·doko ma·manti bosturangni dam rakbatenganiko komiatna gita bostu salgipa rel garirangko nangchongmotenga. Bostu salgipa rel garirangko a·dokona ra·bagenchimode ian a·dokni economy-koba tang·doatgenchim,” ine TMC-ni state vice president George B Lyngdoh parakataha.
Indake ong·genchimoba iani bidingo manderang baksa agangrike, agan-talatanirangko on·chengna nanga ineba Lyngdoh aganaha.
“Bostu salgipa rel garirangni gamchataniko aro namgnirangko manderang ma·sichengna nanggen aro unode rel garirangko ra·baanichi a·dok namgnirangko man·gen,” ine TMC-ni state vice president parakataha.
East Jaintia Hills a·jani mitam bakrangona rel ramarangko cholrangko nina miksongenggipani gimin janapatengon, ian manderangoni re·baengama ma sorkarioni re·baengama uko ma·sichengna nanggen ine Lyngdoh parakataha.
“East Jaintia Hills-ni mitam biaprangona rel ramarangko tarina miksonganiara sorkarini miksongani ong·enga ong·ode manderang iako ra·chakgenma ra·chakjawa, ukoba nichengskana nanggen,” ine Lyngdoh aganaha.
Mai dakgipa rel garirangko ra·bana miksongenga, ukoba ma·sina nanggen ineba ua aganaha.
“Uni gimin ia kamrangko chinga sorkarini jakon pakwatenga. Mongsonggipa project-rangko ra·gatanio pangnan Meghalaya a·doko manderangni nangnikanirangkoba nichengronga ine an·ching gisik ra·na nanggen,” ine Lyngdoh parakataha.