U·IATTIMGIPAONI
SHILLONG: Adita salrangna skang, Shillong songjinmani Laitumkhrah jolo dolgni manderangni dinggrikani ja·man Laitumkhrah police station-ni garirangko so·anio jak donggipa sakbonga manderangko police-rang rim·na man·aha.
Rim·a man·gipa manderang pilakkon kachario mikkangpaatani ja·man, salbongana police-rangni ning·o donataha.
Re·anggipa Sukrobar pringwalo dolgni manderang, chu pekenba Laitumkhrah-ni Health Complex sambao dinggrikahachim aro ia a·sel ong·ani ja·man mitam manderang, Laitumkhrah police station-ona re·ange police-rangni garirangko so·chipeahachim ine nikna man·a.
Koborko on·ani gitade, ua somoio dolgni dinggrikani ja·man, Laitumkhrah police station-ona FIR ka·na re·angahachim indiba ua somoio mitam manderang, police-rangni gari bolsa baksana tourist taxi bolsa aro motorbike bolsako so·e galskaahachim.
Ia manderangoni mitamrang ua somoio, patrol duty-oni matchote re·angpilgipa CRPF sipairangni silchidarerangkoba ra·sekna jotton ka·ahachim ine kobor on·aha.
Indake ong·engon, ia a·sel ong·anina Khasi Students Union (KSU) suk ong·gijaniko parakatenba, Khasi manderang pilakkon ku·mong nangrimchina gita didiataha.
