U·IATTIMGIPAONI
BAGHMARA: South Garo Hills a·jani Baghmara-o donggipa Malikona aro Wagisik gittimo nosto ong·e dongenggipa transformer-ko Baghmara MePDCL-ni manderang, nirok sandianirang dongjaengani a·sel ia jolrango songdongenggipa manderang bijoli gri ong·e dongtokna nangenga ine adita salrangna skang, ia apsan jolo songdongenggipa mitam manderangni songbadrango seataniko Malikona aro Wagisik songni Nokma aro ia gittimo songdongenggipa manderang raken jegalatenba, Baghmara MePDCL-ni kosako iandake matnanganirangara kakket ong·ja ine parakatskaaha.
Malikona aro Wagisik jolo songdongenggipa manderangni parakatani gitade, ia biapo nosto ong·gipa transformer-ko MePDCL-ni manderang, re·anggipa July 7 tarikon, jolo songdongenggipa manderangni dakchakanichi ra·gale galahachim aro ia apsan biapon gital transformer-ko da·o salsa salgnini gisepon chate on·gnok ine ku·rachakaniko on·manahachim.
Malikona aro Wagisik jolo songdongenggipa manderangoniko Baghmara MePDCL gong lak 17.8 grorangko rikengkua ine mitam manderangni matnanganikoba, ia gittim damgnini Nokma aro jolo songdongenggipa manderang jegalataha aro ian gitcham grorangsa ong·a ine talataniko on·angaha.
“Songbado seatani gita ia jolrango songdongenggipa manderangoniko lak 17.8 grorangko MePDCL rikengkua ine matnanganiara kakket ong·ja maina ia sal somoirango ia gittimo songdongenggipa manderang an·tangtangni bil ama gita aro Baghmara MePDCL-ni ge·etani gita bill-rangko gampaenga,” ine ia gittim damgnio songdongenggipa manderang parakataha.
Baghmara MePDCL-ni kosako matnange seanirangko jegalatengon, “Kakketko agangenchimode MePDCL, chingna ta·raken bijoliko on·na gitasa rakbee kamrangko ka·enga aro chinga uamangni kamrangna uamangko mittelpilenga,” ine Malikona aro Wagisik jolo songdongenggipa manderang parakataha.
