U·IATTIMGIPAONI
SHILLONG: East Jaintia Hills a·jaona rel ramarangko tariangna gita sorkarini parakataniko dolbri NGO-rang, chong·motan Khasi Students’ Union (KSU), Hynniewtrep Youth Council (HYC), Jaintia Student’s Union (JSU) and Jaintia Students’ Movement (JSM) dolrang, jegalgrimtaiani ja·man, rel garirangko ra·bana skangba jolo songdongenggipa manderang aro dingtang dingtang dolrang baksa agangrike, uamangni kenchakanirangko chel·atchengna nanggen ine United Democratic Party (UDP) parakatskaaha.
Shillong-ona rel rama taribaaniko dingtang dingtang dolrang jegaltokengani gimin rel ramarangko East Jaintia Hills a·jani headquarter Khliehriat-ona ra·angskana gita cholrangko niani gimin a·dokni Chief Minister Conrad K Sangma parakatahachim indiba uni iako parakatani ja·man, East Jaintia Hills a·jani KSU, HYC, JSU aro JSM dolrang jegalatskaenba, a·doko Inner Line Permit (ILP)-ko ra·gatchenggijade rel garirangko ra·bana man·jawa ine parakatskaahachim.
Indake ong·engon, salgro salaram a·dokrangnaba rel garirangko nangchongmotenga ong·oba jolo songdongenggipa manderang aro dingtang dingtang dolrang baksa agangrikchenge, uamangni kenchakanirangko chel·atchengna nanggen ine UDP-ni general secretary Jemino Mawthoh parakataha.
“Rel garirangko India a·songna aro mongsongbate salgro salaram a·dokrangnaba namen nangchongmotenga indiba a·dokona niam gri napsrukanirangko sorkari champengna man·jaenga ine dingtang dingtang dolrang, namgipa niamrangko ra·gate on·chenganikosa nangniktokenga. Dingtang dingtang dolrangni aro a·doko songdongenggipa manderangni nangnikenggipa ILP-ko ra·gate on·na man·genchimode anga bebera·a manderang, mandeko salgipa ba bostu salgipa rel garirangkoba ra·chakaigenchim,” ine Mawthoh aganaha.
Indake ong·engon, Khliehriat-ona rel garirangko ra·angna miksongenggipa bidingo dingtang dingtang dolrang baksa agangrikdilna kusi ong·aigen ine Khliehriat-ni MLA aro a·dokni Cabinet Minister Kyrmen Shylla parakatskaaha.
Shylla-ni parakatani gitade, dingtang dingtang dolrang baksa agangrikanio ua Sutnga-Saipung-ni MLA Santa Mary Shylla-koba rimchapanggen aro rel garirangko ra·baani bidingo NGO-rangna ma·siatna jotton ka·gen.
Iani bidingo ua a·dokni Chief Minister Conrad K Sangma baksa agangrikmanaha ine janapatengon, East Jaintia Hills a·jaona bostu salgipa rel garikosa ra·bana miksonganirang dongengachim ine Chief Minister, una aganataha ine Shylla parakataha.
Bostu salgipa rel garirangko ra·bana man·genchimode pilak bosturangni damrangan komianggen aro bading chiwalanirangoba tang·dona man·e manderangna bang·en namgni ong·genchim ineba Khliehriat MLA parakataha.
