U·IATTIMGIPAONI
TURA: Adita salrangna skangmangmang, West Garo Hills a·jani Chenggapara songo, bijoli sala man·gipa nokdangna tangka paisarangko dai dake gamskachina dabie, West Garo Hills a·jani Deputy Commissioner-na memorandum-ko on·angaha.
Ia a·selni bidingo Deputy Commissioner-na sedoatgipa chittio parakatani gitade, MeECL-o kam ka·gipa manderangni simsakjahani a·sel, re·anggipa July 9 tariko nokdang ge·sani sakgittam manderang, chong·motan bilsi 35 ong·gipa Epsilla N Marak, bilsi 1 ong·gipa Blessa Glory S Sangma aro bilsi 22 ong·gipa Brian Donseng M Marak, bijoli salako man·na nangahachim. Bijoli sala man·anio Epsilla aro Blessa Glory-de bilongbee saknaanirangko man·na nangaha indiba Brian Donseng-de an·tangni nokon siangna gita nangskaahachim.
Ia a·selni bidingo MeECL-o kam ka·enggipa manderangko matnangatengon, ia a·sel ong·ani apsan salon, Purakhasia Police Station-o FIR-koba ka·aha ine Deputy Commissioner-na sedoatgipa chittio, ia nokdangni saksa Bostone M Sangma parakataha.
Indake ong·engon, duko ga·akenggipa nokdangna ta·raken tangka paisarangko gamchina gitaba ua district administration-ko didiataha.
