U·IATTIMGIPAONI
TURA: Tura Dakkopgre-o PA Sangma Sports Complex-ni sambao Health Centre-ko rikanirang namja ine nikna man·ahani gimin ia nokko rikenggipa contractor-ni kosako rakbatsranggipa ja·kurangko de·china aro ia health centre-ko manderangna naljokgnigipa ong·e riktaichina gita Tura Walbakgre-oni social activist saksa Cherian Momin, a·dokni Chief Minister Conrad K Sangma-na sedoataha.
Adita salrangna skang, New Tura Development Committee-ni membor-rang, West Garo Hills a·jani Deputy Commissioner Jagdish Chelani baksa PA Sangma Sports Complex sambao rikenggipa health centre-ko nina re·angon, ia gadanggni rikenggipa nokni ka·mabatsranggipao a·arang naptomangengaha ine nikna man·ahachim aro iani bidingo West Garo Hills a·jani Deputy Commissioner an·tangan rakgipa ja·kurangko de·na ku·rachakaniko on·angahachim.
Indake ong·engon, ia health centre-ko iandake simsakgija rikaniara ia health centre-o kam ka·nagipa aro sanna bananirangko ra·nagipa manderangna kenchakna nanganiko ong·atengachim ine Momin, an·tangni suk ong·gijaniko parakatenba, ia nokko manderangni namgnina nambate riktaina gita ja·kurangko de·china Chief Minister-ko mol·molataha.
Ia nokko rikani bidingo ta·raken inquiry-ko dakenba, mikkangchi iandakgipa obostarang ong·taijana gita nokko rikgipa contractor-rangni kosako rakbatsranggipa ja·kuko de·china gitaba Momin didiataha.