U·IATTIMGIPAONI
TURA: South West Garo Hills a·jani Indo-Bangla sima ari jolrang gita matchu, motorcycle aro ma·manti pekatgipa bosturangko palsrukanirang batroroengani gimin aro bobil dake chakatgipa dolrang baksa jak donggipa manderang Bangladesh a·songoni napsrukbana cholrangko ra·enga ine nikengani gimin walantian attamni 6:00 bajioni pring 6:00 bajiona Bangladesh a·songni sima arioni metre 100 ong·gipa biaprangona kingking manderangni niam gri re·ruraaniko champengna gita South West Garo Hills a·jani District Magistrate Section 144 CrPC-ko ra·gatangaha ine u·iataha.
Koborko on·ani gitade, ma·manti bosturangko niam gri badingenggipa manderang, a·song damgnini tom·chimonge, bosturangko badinggrikenga aro iandakgipa manderang, sima jolrango nirokenggipa BSF sipairangkoba ma·manti silchidarerangchi chadrappangpilna jotton ka·anirangko knasona man·ahachim.
Uni gimin iandakgipa kamrangko champengna gita attam 6:00 bajioni pring 6:00 bajiona ia sima jolrang gita re·ruraaniko champengatchengenga ine SWGH a·jani Deputy Commissioner u·iataha.
Ia niam, sipai dolrangna aro uandake niam retirangko rakkienggipa dolrangnade nangchakeani dongjawa.
Gital u·iataniko on·taikujaskal walantian ia niamko ja·rikanggen ineba ua u·iataha.