U·IATTIMGIPAONI
BAGHMARA: Km 20-mang ong·gipa South Garo Hills a·jani Chokpot-Sibbari ramako tariani bilsi 7 ong·pilahaoba matchotchipkujaenga aro uandaken da·o wachini somoiode ia rama gita dal·dalgipa garirang re·na man·jaengaha ine kobor on·aha.
Jolo songdongenggipa manderangni parakatani gitade, mikkarang waangani ja·man da·o ia rama gimikan a·dubekrara dakenba, ia ramako re·ruraenggipa gari gorarang rama jangchirangon jachange dongna gita nangtokpilengachim.
Ia ramako 2017 bilsio Mukul Sangma-chi dilenggipa MUA sorkarini somoion tarina a·bachengatahachim indiba da·o bilsi 7 ong·angpilengahaoba ia ramani tong·sakomangba taria matchotkujaenga ine kobor on·timgiparang parakataha.
Ia ramako sawamancha tarienga ukoba ma·sitokjaenga maina ia ramao kam ka·anirangko uamang ru·uta somoirangonin nikchipjaenga ineba jolo songdongenggipa manderang parakataha.
“Ia ramani mitam bakkode kamrangko a·bachengatani bakan matchotahachim indiba uni ja·mande kamrangkon nikna man·taijaha. Ia ramako tarianirangba bilongen namjani a·sel mitam matchotgimin bakrangba da·on nosto ong·piltaiaha,” ine kobor on·timgiparang parakataha.
Ia ramasan ong·aigija, Baromile-oni Chokpot-ona dakanggipa ramani obostarangba namsrangjaengahani a·sel ia ramako re·ruraenggipa manderang bilongen neng·nikanirangko chagrongna nangtokengaha ine kobor on·timgiparang parakataha.