U·IATTIMGIPAONI
SHILLONG: Bristibar salo, Education department-ni gita Meghalaya Education Symposium 2023-ko ong·atangaha aro ia program-ko ong·atanio a·dokni Chief Minister Conrad K Sangma, Education Minister Rakkam A Sangma, Health Minister Ampareen Lyngdoh aro dingtang dingtang official-rangba bakko ra·angaha.
Ia program-ko ong·atanio, ia 2023 bilsini SSLC aro HSSLC porikkao topper ong·gipa chatro chatrirangnaba a·dokni Chief Minister aro gipin dilgiparangni jakchi mande ra·pilskaaniko dakangjolaha. 2022-23 bilsini UPSC CSE-o rank man·e pass ka·gipa Swapnil Bhattacharya-naba dingtangmancha mande ra·pilskaaniko dakangaha.
Ia program-ko ong·atanio, a·dokni Chief Minister, tom·anio bak ra·giparangna aganprakangengon, a·dokni namroro silroroanina sorkari, scheme-rangko ra·gatmangmange on·aigija ia scheme-rangko ra·gatanichi mai namgnirangko man·enga, ukoba nienga ine parakataha.
“Chingni sorkari, kamrangko dingtang dake nina a·bachengaha aro chinga scheme-mangmangko ra·gatanichisan namroro silroroaniko ra·bana kam ka·jaenga indiba ia scheme-rangni nangchakeanirangkoba chinga nipiltaienga,” ine Sangma aganaha.
Meghalaya a·doko da·o nangbatenggipa dingtanganiara chanchiani bewalko dingtangatanian ong·enga ine janapatengon, chanchianiko dingtangatanichi songsalko nambate re·mikkangatna man·gen ine Chief Minister parakataha.
Education department-ni kamrangko namdapatna gita sorkarini ka·enggipa kamrangni gimin janapatengon, mandeni janggi tangani gimikon maikai lekka pora aro an·seng baljokaniko on·na guta kamrangko ka·engachim, uarangni bidingo Sangma aganangaha.
Ia tom·anio a·dokni Education Minister Rakkam A Sangma-ba jinmana aganprakangengon, National Education Policy 2020-ni bidingo talate on·angenba, ia policy-ara ma·mong aro a·dok sorkarirangni miksonganirangko tarigipa ong·a ine parakangaha.
Ia Meghalaya Education Symposium 2023-ko Meghalaya Board of School Education (MBOSE)-ni bilsi 50 gapaniko maniani bak gita Education department ong·ataha.
