U·IATTIMGIPAONI
TURA: Meghalaya a·dokni dingtang dingtang koela a·damrango niam gri koela bikotaniko champengna man·jaengani a·selsa South Garo Hills aro East Garo Hills a·jani sima jolrango donggipa West Khasi Hills aro East Khasi Hills a·jani badiaba badiaba biaprango niam gri koela so·ani karkanarangko chalaianiba batroroenga ine Budbar salo, Meghalaya High Court-ni songako man·gipa National Green Tribunal (NGT)-ni judge Justice BP Katakey parakataha.
Budbar salo ua, Garo Hills-o niam gri koela bikotanirangko nina gita re·baani somoio iako kobor ra·timgiparangna parakataha.
Ia koela a·damrangko drone-rangchi nirokjringgenchimode ia jolrango niam gri koela bikotanirangko champengna man·gen ineba ua aganaha.
Katakey-ni parakatani gitade, South Garo Hills a·jani Nongalbibra jolrango niam gri koelarangko bikotenga ine dingtang dingtang dolrangni badi ka·anirangko man·ahani gimin ua an·tangan mikrontangchi nie ra·na gita Garo Hills-ona re·baaha.
“Koelarangko niam gri bikotengani a·sel aro badingatengani a·sel a·dokni badiaba badiaba niam gri karkanarangkoba kulitokaha. Ia karkanarangara bang·batan koela so·ani karkanarang ong·a aro ia karkanarangko West Khasi Hills a·jani Shallang jolrango aro East Khasi Hills a·jani badiaba badiaba bakrangoba nikna man·enga. Je biaprangon niam gri koelarangko bikotengachim, uandakgipa biaprango coke karkanarangko bang·en kulitokaha,” ine Justice Katakey aganaha.
Uni somoion niam gri chalaienggipa dam 50 karkanarangkode NGT chipe donatna gita man·ahachim ine janapatengon, “Ia coke karkanarangoni mitamde sorkarini permission dongachim aro gipinrangde dongja indiba uamang pollution control board-ni clearance-de dongja,” ine Katakey parakataha.
“Garo Hills-o songdongenggipa manderangoniko niam gri koela bikotenggipani bidingo anga bang·en badi ka·anirangko man·soahani giminsa an·tangan niam gri koela bikotanirangko nina re·baaha. Ia somoio koela badinganio bang·en ong·gija dakanirangko nikna man·enga,” ine ua aganaha.
Bangladesh a·songona bang·en koelarangko watataha aro ia koelarangko watatanio sorkarinade maming man·pilskaanirang dongjaha ineba ua parakatenba, iani bidingo sandirokaniko dakna git aua ge·etaniko on·aha ine talataniko on·angaha.
