U·IATTIMGIPAONI
TURA: Adita salrangna skang, Shillong songjinmani Laitumkhrah jolo dolgni dinggrikani ja·man, East Khasi Hills a·jao aro mongsongbate Shillong songjinmao dokkanrangko walni 10:00 bajini gisepon chipchina gita ge·etaniko on·ahanin gimin BJP-ni state vice president aro Tura-ni MDC Bernard N Marak, a·dok sorkariko sing·doatskaaha.
“Ia a·sel ong·anio maming bak dongpagijagipa manderangsa aro mongsongbate bading chiwale cha·enggipa manderangsa iandakgipa ge·etaniko on·anichi neng·nikanirangko chagrongna nangtokenga. Mitam manderangde walni somoirangosa palbadinge cha·na cholrangko man·paengani gimin dokkanrangko seng·gnang chipchina ge·etaniara namen ra·chakna man·gijani ong·enga. Iandake chonbegipa a·selnan dal·begipa ja·kuko de·na nangenga ong·ode ian a·dok sorkarini chu·sokgijaniko mesokanisa ong·enga,” ine Marak parakataha.
Dokkanrangko seng·gnang chipatachi iandakgipa a·selrangko namatna man·genma ineba Marak sing·doataha.
“Walni 8:00 bajio iandakgipa a·selrang ong·taina nanggenchimode dokkanrangko attam 6:00 bajion chipatskagenma? Iandakgipa a·selrangko champengna nambata cholrangko sandiani pal ia sorkari, gitcham chasongni gisik gitasa ja·kuko de·skaenga,” ine BJP-ni state vice president parakataha.
Adita sak manderangni dinggrikanina maina songjinma gimikko sasti on·enga ine sing·doatengon, neng·nikanirangko man·enggipa manderangni namgnina ia niamko ra·galchina gita Marak, a·dok sorkariko aro East Khasi Hills District Administration-ko didiataha.
Indake ong·engon, badiaba badiaba biaprangode dokkanrangko sorkari, walni 11:30 bajiona kulina gita on·engaha ine koborko man·soaha.