U·IATTIMGIPAONI
SHILLONG: Ia sal somoirango manderangni nangchongmotgipa bosturangni dam rakdugaengani a·sel manderang neng·nikanirangko chagrongna nangtokengani gimin Bristibar salo, Voice of the People’s Party (VPP)-ni dilgiparang, a·dokni Chief Minister Conrad K Sangma-ko grongenba, damrangko komiatna gita ta·raken ja·kurangko de·china didiangaha.
Ia sal somoirango Meghalaya a·dokni pilak biaprangon nanga gita mikkarang waengahaoba, salo baditaba kontarangna bijoliko kimitkuengani a·sel manderang neng·nikanirangko man·tokna nangengani giminba bijoli kimitaniko dontongchina aro manderangna chu·onga gita bijoliko on·china VPP-ni dilgiparang, a·dokni Chief Minister-ko didiangaha.
Chief Minister-ko grongani ja·man kobor ra·timgipa manderang baksa agangrikengon, batanggimin jarangonin a·doko nanga gita mikkarang waengaha aro Umiam dam-oba chirangna gapna sipilengaha indiba da·onan bijoliko kimitkuengani a·sel manderang neng·nikanirangko chagrongna nangengani gimin uamang, bijoli kimitaniko dontongchina sorkariko didiaha ine VPP-ni president Ardent M Basaiawmoit parakataha.
A·doko nangchongmotgipa bosturangni dam rakdugaengani gimin janapatengon, manderangni nangchongmotgipa merong, dal aro uandakgipa bosturangni dam rakdugaengani a·selan kangal cholgri manderangde okumu dongna nangenggiparangba donga ine Basaiawmoit talataniko on·angenba, iani bidingo ua a·dokni chief minister-ko niatchina gita didiaha ine parakataha.
VPP president-ni parakatani gitade, a·doko game ge·e cha·enggipa manderangni man·gnirangko ‘dalali’ dakgipa manderangni ra·e katna jotton ka·engani giminba uamang chief minister baksa agangrikaha aro game ge·e cha·enggipa manderangni neng·nikanirangko nirokatchina didiangaha.
Indake ong·engon, a·doko songdongenggipa manderangni namgnina ia pilak kamrangkon a·dokni Chief Minister niatna ku·rachakaniko on·ataha ineba Basaiawmoit parakataha.
