U·IATTIMGIPAONI
Tura: Achik Conscious Holistically Integrated Krima (ACHIK) dol Tura-songjinmako winter capital songchina dabienba dingtang dingtang Garo Hills-ni bakrango soi ka·e dabianirangkoba a·bachengataha.
Tura songjinmao dingtang dingtang NGO dolrang aro pilak chakpagiparang roster system aro Tura songjinmako gnigipa Meghalaya-ni capital ba winter capital songchina okumu chake dabianiko adita salrangna skang a·bachengatahachim. Indake uamangni okumu chake dabianiara da·alona sal 5 gapengahachim.
“Chinga Tura-ko winter capital songchina soi ka·e dabianio pilak a·doko songdonggiparangko bakko ra·pachina mol·mola.Ia dabianiko a·bachengataniara ian na·simangni chakpaaniko man·na ar mesokna unbaksana mongsongbate an·chingni a·doko dingtang dingtang neng·nikanirangko chagrongengani bidingo sorkanina ma·siatna gita ong·atenga” ine ACHIK dolrang parakatanikoba on·aha.
“Chinga bebe ra·a chong·motgipa apsangrik namroro silroroaniko man·anide uan social, economic aro environment iarango nangrimgrikani dongosa man·gen. Ia soi ka·e dabianiko a·bachengatanio, ACHIK dol sakanti songdonggiparangan bakko ra·na nanga maina sakantini bakko ra·achisa krimko apsan ku·cholsan ong·aniko mesokgen aro dingtang dingtang da·alo chagrongenggipa obostarangko mesokna sakki gitaba ong·gen” ine uamang agandapaha.
Dingtang dingtang NGO-rangni aganani gitade ia soi ka·e dabianiko a·bachengataniara uan namen bilakbegipa silchidare gita ong·gen maina iachin pilak manderangni chakpaaniko mesokgen aro ACHIK-ni niksamsoanirang chu·sokani rama gita ong·gen.
“Iano an·tangtangni bimungrangko soi ka·e on·gilpaaniara uan pilak songdonggiparangni ku·rang on·anikoba mesokgen aro uan dabianikoba dingchikatan baksa su·ubatatgen aro an·chingni namroro silroroanina ja·ku de·anio jedake education, healthcare, environmental sustainabilsity, cultural preservation, social justice aro dingtang dingtang namdapanirango apsano an·chingba bakko man·pagen” ine uamang aganangkuaha.
NGO-rangni ia campaign-ko ong·atanio mongsongbate dingtang dingtang biapo ba area-o dongenggipa ba songdongenggipa baiparangona sokatana gita miksongani ong·a aro bilsini kri, me·a aro me·chik, social background aro dingtang dingtang a·doko apsano namdapanirangko man·na gitaba miksonganirang ong·achim.
“Chinga bebe ra·a skantini ia campaign-ko ong·atanio bakko ra·anian mongsonggipa ong·gen aro uan an·chingni mikkangchini miksonganirangko bimang ong·atgen unbaksaba an·tangtangni biminrangko seenba dabianiara uan an·chingni chakchigija on·kange dabianikoba mesokgen” ine dingtang dingtang NGO-rang agandapangkuaha.
