SHILLONG: Meghalayao sorkariko rikenggipa MDA Sorkari bakrimgiparango mongsonggipa dolsa United Democratic Party (UDP), uamangni gitalgipa party president aro officer bearer-rangko seokna gita tariengon, party-o dingtang dingtang post-rangna party dilgiparangni susaani system ba bewal dongja ine UDP working president Paul Lyngdoh parakaha.
President-ko man·chape post ge·antinan dolsa nomination committee, bimingrangko ra·bagen, unigimin pilak kamrangan nomination committee-ni jakosa ong·aia, Lyngdoh aganaha.
UDP-o apsan manderangan kamtangtangko ra·piltokaigenma ine sing·on, party, nomination committee-ni de·e ra·baaniko nichakgen ine Lyngdoh aganachakaha.
Nomination committee party president aro party-ni dingtang dingtang post-rangna bimingrangko seokbagen, jerangkon UDP-ni donsogimin gita re·baenggipa July 29 tariko tom·anio parakanggen.
Indakeba gisik ra·atna man·a je, uamangni gitcham party president Donkupar Roy-ni 2019 bilsio siangaoni intal Mairang MLA Metbah Lyngdoh, party president ong·e dilbaenga.
Party-ni chief executive committee-ni term ba bilsi 2022 bilsion matchotahachim, indakoba sabisi saginchirangni a·sel aroba Assembly election-rangni a·sel general council meeting-ko dontongna ga·akahachim.
Unomitingo party-ni general secretary Jemino Mawthoh-ni parakani gitade, nomination committee-o, gimik district-onin, district president, secretary, youth wing, womens’ wing aro farmers’ wing-ni president secretary-rangkoba napatgen.