SILCHAR: (PTI) Salgro-Salaramni a·dok damgnini gisepo kajia-golmal gnanggipa sima arini bidingo Assam aro Meghalaya-ni a·gipi minister-rang Sonibar agangrikaniko dakangaha ine saksa official aganaha.
Assam-ni Forest aro Environment Minister Chandra Mohan Patowary aro Meghalaya-ni Deputy Chief Minister Sniawbhalang Dhar mang, Assamni Cachar aro Meghalayani East Jaintia Hills district-ni sima arirangni bidingo agangrikangaha aro a·jol damgnini official-rangko report-rangko sulsul tarichina gita ge·etanikoba on·aha ine official parakataha.
Uamangni tom·aniko Meghalaya-ni East Jaintia Hills district-ni Umkiango ong·ataha.
Tom·ani ja·mano, Patowary koborni manderangna Silchar sokango aganaha je a·dok damgnian sima arini golmalrangko namatna siktokenga.
“Manderangni nangnikaniko knachengani ja·man aroba damgni district-rangni deputy commissioner-rangni report-rangko pakwatani ja·man nanga ja·kurangko de·gen” ine Patowary aganaha.
Cachar Deputy Commissioner Rohan Kumar Jha, East Jaintia Hills DC Abhilash Barnawal, district damgnini police superintendent-rang aro organisation-rangni representative-rangba chanchirimanirango dongpaaha.
A·dok damgnini sima ario kajia golmal gnanggipa dam 12 biaprangoni damdok biaprangko sima tik ka·na gita a·dok damgnini gisepo da·sikkari March jao Memorandum of Understanding (MoU)-ko soi ka·grikahachim ine nikna man·a.
Da·o dongspa damdok biaprango sima tik ka·na gita re·anggipa May 24 tarikosan Assam Chief Minister Himanta Biswa Sarma aro Meghalaya Chief Minister Conrad K Sangma agangrikmanaha.
