SHILLONG: VIP culture-ko bon·atani bidingo aro sakantian apsan ong·a ingipa kattarangko dingtang dingtang program aro tom·anirango politician-rangni ku·sikrangoniko knaronga indiba chong·mote a·songo ba a·dokoba ong·chong darang politician-ni iako ja·rikanikoba niknade neng·a.
Shillong-ode, Shillong Traffic police-ni VIP-rangna dingtangmancha ramarango chol on·anirangko nika.
Overtake ka·giparangko rim·gen ine Shillong Police pil·ni pil mikrakataniko on·genchimoba, indakgipa rules ba niamrangko VIP-rangnade jakkalja, maina ramarango garirangni changket-sikket dakomangba VIP-rangde uamangni SUV-rango siren gam·atenba re·chichiangaianiko nikna man·a.
Basakoba salrangode VIP-rang nanggitikgipa kamrang dongnaba donga ine bang·an chanchia indiba VIP garirang salantian siren-rangko wate songresimaia.
Basakobade VIP garirangni traffic-ni niamrangko pe·anirangko nika, mijamangmangoba, VIP gari bolsa, police gypsy bolsani dilanio, Barik point-o wrong way ba ong·gija rama gita re·anganiko nikna man·a.
Iarangna agreba, Sorkarini aro bilo donggipa donggipa manderangna mangmang dingtang dake tarie ba cholwate on·anirangkoba nikenga.
Khyndailad ba police bajar junction-o, ramram manderangkode garirangko donna on·ja, indiba mingsa gisiko sa·dikataniara uan, junction-ni noksiko, Minister-rangni, armed force-rangni, Sorkari officer-rangni worker-rangni garirangkode donna on·taipila, jeon ramram manderangkode uamangni garirangko donna on·taija.
Ia VIP culture ba bewalko ja·rikaniara, bilo donggipa manderangko, ramram manderangoniko ma·ekata ine aganenba, Meghalaya High Court-ni Chief Justice Sanjib Banerjee-ba ding·chaoe aganahachim.
