SHILLONG: Labour Corps Day-ko gisik ra·ani salo Tura MDC Bernard N Marak, Tura-ko Winter Capital songchina dabianio namnikpaaniko janape, kragipa dabianian ong·a ine agantaiaha.
“PeacePact”-ko soi ka·na skang Winter Capital-na dabianian skanggipa dabiani ong·achim, jekon bilsi 12 skang ma·mong sorkario dabiaha. A·dokna dabimiting somoio bilsi 50 skang Garo Hills-ni manderangna Winter Capital-ko on·na ku·chakahachim, indiba gitcham dilgiparang ia dabianiko chu·sokatgijan gale donaha, indiba ‘Peace Pact’-ko soi ka·mitingo somoio ia mamlako nakatataiahachim. Indiba a·doko dingtang dingtang neng·nikarang sokani a·selo uarangko namatna re·mikkanganio aro gital gital dabianirangko chu·sokatna kam ka·anio Winter Capital-na ja·ku de·anio ja·manchakskaha.”
Marak-ni aganani gita, tripartite agreement-ko ra·gataniara ka·dongsoa ba chanchisoa gita ong·jaha. Rama-ja·lang, infrastructure aro bang·a development-ni kamrangko jekon a·doko ka·enga, uarang gimikan tripartite agreement-ni gimin ong·a. Jekon a·dok sorkari an·tangna bimingko ra·skaha, indiba je dilgiparangan agreement-ko soi ka·ahachim uamangko gisik ra·jaha.
“Civil society group ba dolrangni Tura-ko Winter Capital songchina dabianira kragipaan ong·a, jekon CM, a·bachengatna ba ja·ku de·na nanga. A·chik manderangni a·dokko man·a dakgrikaniko BJP, u·ichaka aro mande ra·a. Bang·arang, mikkangchi nambatgipa salrangko man·a nikjumanganio janggitangko on·kangaha. Bi·sarangni namgipa janggi tanganina aro a·a-chigako, jatni dakrik-bewalrangko, ku·sik aganarangko ripingna kam ka·angaha. BJP, election-ni manifesto-o mini secretariat-ni giminba janpapaha aro ia chu·sokatna jotton ka·enga, ine Bernard aganaha.”
