SHILONG: ACHIK dolni gita Winter Capital-na okumu chakpile kingkot dabiengmiting somoio, Tura-ko winter capital-na dabianiara ra·chakna amgijani ong·a ine Hynniewtrep National Youth Front (HNYF) president Sadon Blah aganaha.
Sombaro koborni manderangna aganengon, Meghalaya chonbegipa a·dok ong·a, unigimin Tura-ko winter capital-ko dabianide ra·chakna kraani ong·ja, Blah aganaha.
Indakgipa dabianirang, a·doko tribalrangni gisepo ka·dongchakna man·grikgijaniko aroba ma·sichakgrikgijaniko ra·bana jotton ka·a gitasan ong·aia, India gimikkon Delhi-o capital done sason ka·tokna man·aia ineba ua aganaha.
Tura-ko Winter Capital songchina ACHIK-ni dabianio Garo Hills-ni bang·a dilgiparang chakpaaniko on·engon, Meghalaya Chief Minister Conrad Sangma da·o dipetode iani biding ku·samangkoba ku·watani dongkujaenga.
