TURA: TMC youth dilgipa Richard Marak, Tura-o Labour Corps Day-ko dingtangmancha manijani gimin suk ong·gijaniko parakate, ian namen dukni ong·a, a·songna dakgrike sichakgipa ka·dongrakgipa Garo-rangko nichanga ine aganaha.
“Itihaso mingsinggipa manderangko gisik ra·gija dakaniara namen dukni ong·a. “Mikkango dongjahaon, gisikoba dongjajok’ ingipa dakaijok. Labour Corps Day-ko official-ni gita manijaha, memorial service-ba dongja, iarangna agreba police department-oni salutations ba salami ka·ani dongja. A·songna dakgrike sichakgipa ka·dongrakgipa Garorangko pangnaba gualna nangja, uamangko an·ching gisik ra·kame mande ra·aniko dakna nanga. Sorkari aro authorities, ia salko manidilna ja·ku de·na nanga” ine Marak aganaha.
A·chik manderang, jemangan a·songna dakgrikaha, uamang skia man·gipa sipairang ong·jagenchimoba a·songna ka·sae dakgrikna re·mikkangaha ine TMC dilgipa aganaha.
“Uamang ramarangko tariaha, bosturangko chilaha. Ia kamrangko dakgrikani somoio chonbegipa kam dake niknaba gnang, indiba uamang on·kanganiara aiao inmanpilgipa ong·a. Uamang songtang-noktangko, ka·sagiparangko wate gipin a·songona re·angaha aro dakgrikani somoio baditan duk neng·nikarangko chagrongaha. Uamangni ong·kangako gualna man·jawa, aro uamang mande ra·ako man·a kragipa ong·a,” ine Marak aganaha.
Indake ong·engon TMC dilgipa, sorkari aro authorities-ko ia salko dingtangmancha gisik ra·na ba manina ja·ku de·dilchina mol·molataha.
