Ampareen-ni kattara, Winter Capital-na dakdil-ka·dilgiparangko chonnika ong·a: ACHIK

TURA: ACHIK-ni Tura-ko Winter Capital songchina dabianiko knachakna nangja ine Health Minister Ampareen Lyngdoh-ni agangipa kattana, jingjengatgiparang suk ong·tokjaha. Ampareen-ni agangipa kattara kraa ong·ja, ian Winter Capital-na dakdil-ka·dilgiparangko chonnika gita ong·a’ ine ACHIK aganaha.
Ampareen-ni agangipa kattana aganchakatengon, ACHIK, indine aganaha, “saksa gisik matsramgipa dilgipa aro  minister-oniko iandakgipa kattako knasoe chinga jagokpilaha. Uni agangipa kattara seng·gipa dilgipani agana katta gitan ong·jaha, uni kattako knae jingjengatgiparang ka·onangtokaha, dilgiparangan iandakgipa kattako agangenchimode sorkarini a·dokni gimik manderangna apsangrik ong·e kam ka·na ku·chakaniko ka·dongani dongja.”
“Winter Capital-na dabianirangko knachakna nangja. Bebegita, spring, autumn, winter, monsoon Session-rangko ong·atode gimikon capital-rang donggnok, unode administration-an dakgni chong·mokon jaktuatgen,” ine Lyngdoh aganaha.
Meghalaya indinan ma·eke donggipa district-rangko nangrimate rikgipa a·doksa ong·a, da·o sakantian  winter Capital Hill ba spring capital-ko dabitokode pilakan ong·gijaona sokanggen, Minister aganaha.
“Winter Capital-na dabianiko jechakaniara chingni pagitcham dilgiparang jemangan Winter Capital-ko man·a re·dilahachim, uamangko mande ra·gija gita ong·a. Ian da·oni gital dabigipasa ineba ong·ja. Chingni gitcham dilgiparang, administrative capital-ko donna miksonge kam ka·angahachim indiba chu·sokatna man·angjaha. Winter Capital-ko done, haida uamang Meghalaya a·dokni gimik bakrangona apsangrik development-ko ra·bana nikjumangaha.”
“Winter Capital-na dabianiko knachakja ba jechakaniara kraa ong·ja ine gitcham MCS officer Laben Ch Marak aganaha.
Tura, a·dokni western bak ong·ani gimin a·dokni skotong Shillong baksa tosusagrika ong·ode  development-o ja·manchakgipa ong·enga. Indiba Winter Capital-o donna ong·ode, apsangrik development-ko ra·bana man·gen ine ACHIK aganaha.
Jolni dilgiparang aro Tura-ni activist-rang Lyngdoh-ni agangipa kattana suk ong·gijako parakataha. Aro sorkariko a·dokni skotongkosan nibatenga, gipin biaprangko nichanga ine matnangaha.