TURA: Turako Winter Capital dakchina gita ACHIK aro gipin NGO-rangni dabigipani bidingo dolsa regional party, KHNAM dilgipa Thomas Passah ma·sijokjaha. Na·a Himachal Pradesh-ni giminsan ma·siaiani gimin, badia a·dokrango damgni damgittam state capital-rang donga ma·sichenge ra·bo ine aganan baksa, Jammu aro Kashmir, Andhra Pradesh, Karnataka aro Uttar Pradesh a·dokrangko niatbo, jeon damgnini state capital-rang donga ine mesoke on·ataha aroba Uttar Pradesh gita dakgipa a·dokde, Prayagraj-ko Judicial Capital aro Lucknow-ko Administrative Capital dake jakkalenga ine ACHIK de·e mesokataha.
Gnigipao pilakni gitan silroroaniko ra·bana gita Tura-ko Second Capital ba Winter Capital songchina dabianiara kragipan ong·a. Ia dabianiko skang 1972-on a·bachengaha; indakoba da·o bilsi 51-ni ja·manba bimang ong·atkuja ine ACHIK aganaha.
Batanggimin bilsirango namroro-silroroatanina kam ka·anio Garo Hills-an bang·batako man·aha ine aganani giminba ACHIK, Garo Hills-ona wenangenba GH-ni obostarangko Shillong baksa tosusae nichina gita Passah-ko aganaha. Passah, aganode kakketkon nikchangaha, maina ia bilsni Budget Speech-o chong·motan 2022–2023-ba budget tarigipao Shillong Smart City project-na chamgipa kror 700-oniko kror 1000-na tang·doataha, jeon Tura Smart City-nade kror 50-kosan chamaia, jeni copy-kon Meghalaya Sorkarini website-o man·gen, indakoba iako chinga mamingsaloba simbraja aro jeba jegalja, ACHIK aganaha. Unigisepon na·a Shillong-o an·tangni maha maha noko asongari, maming data aro sakki gri Garo Hills-an bang·bate development-ko man·enga ine na·a maikae a·kangna man·a? Jeko aganna skangba iachi re·bae chong·motko nie-nike ra·chengbo ine chinga nang·nok mandera·e mol·molenga. Chong·mote saobasa bang·bata bak-rengsiko man·enga, ACHIK aganaha.
MATI, Meghalaya Legislative Assembly, NEIAH, IHM, NIFT, aro Shillong Technology Parks, iarangan dal·dalgipa mitam project-rang ong·enga, jerangkon New Shillong Township-o rikaha. Shillong-an, project-rangko bang·bate man·enga. Indiba bang·bata development-kon Garo Hills-sa man·angenga ine na·ade a·kangskaenga. Unigimin, Mr. Passah, na·ade “Equality,” ingipa kattani miksonganiko ma·sina ja·manchakenga, jean apsan ong·aniko mesokenga, uagitan ge·gni capital dongora maidake bal-boja ong·gen? ACHIK sing·doaha.
Unigimin nang·ni party-ara a·doktangni namgni miksonge bikotgipa regional party ong·ani gimin, chingni dabianina chakpabo ine chinga nang·ko ku·pattia, jedakgipa kaman, dakbewalo, daka-rikanirango dingtangrikaniko nangrimatgen aro ka·dongchakna man·gijaniko chel·ate, Khasi Garo Jaintia-ni gisepo jong-ada chane songdong-a·chaaniko dal·roro-silroroatgen, ACHIK aganaha.
